ڈیگو جوٹا اور والد کے انتقال پر کوناٹے کا ڈپریشن کا اعتراف

فرانسیسی ڈیفنڈر ابراہیما کوناٹے نے انکشاف کیا ہے کہ وہ لیورپول کے ساتھی کھلاڑی ڈیگو جوٹا اور اپنے والد کے انتقال کے بعد شدید ڈپریشن کا شکار رہے لیکن اس کے باوجود پیشہ ورانہ ذمہ داریاں نبھاتے رہے۔

پرتگال کے فارورڈ جوٹا اور ان کے بھائی آندرے سلوا گزشتہ جولائی کار حادثے میں ہلاک ہوئے، جبکہ کوناٹے کے والد جنوری میں طویل علالت کے بعد چل بسے۔

کوناٹے نے فرانس انٹر ریڈیو کو بتایا کہ فٹبال میں بھی کھلاڑی ڈپریشن کا شکار ہو سکتے ہیں اور اس کا اعتراف کرنے میں کوئی شرم نہیں ہونی چاہیے۔ انہوں نے اس تاثر کو فضول قرار دیا کہ زیادہ پیسہ کمانے والے کھلاڑی ڈپریشن کا شکار نہیں ہو سکتے۔

رواں سیزن لیورپول چھوڑنے والے 27 سالہ کوناٹے نے کہا کہ ان المناک واقعات نے انہیں توڑ کر رکھ دیا تھا، لیکن کلب کا ملازم ہونے کے ناطے وہ میدان میں واپس لوٹنے پر مجبور تھے۔ انہوں نے بتایا کہ والد کی وفات کے بعد وہ ٹیم کو انجری کے بحران سے نکالنے کے لیے رخصتِ غم سے جلدی واپس آگئے تھے، تاہم وہ ذہنی طور پر پوری طرح سنبھل نہیں پائے۔ فرانس کی طرف سے 27 میچز کھیلنے والے کوناٹے ورلڈ کپ اسکواڈ کا حصہ ہیں۔