کراچی میں دن کے اوقات میں ہیوی ٹریفک کی آمد و رفت پر دو ماہ کے لیے پابندی عائد

کراچی کمشنر نے شہر میں بھاری ٹریفک کی دن کے وقت آمد و رفت پر دو ماہ کے لیے پابندی عائد کر دی ہے ,تاکہ گاڑیوں کی طویل قطاروں اور روڈ حادثات میں کمی لائی جا سکے۔

کمشنر سید حسن نقوی کے جاری کردہ نوٹیفکیشن کے مطابق یہ پابندیاں سیکشن 144 سی آر پی سی کے تحت نافذ کی گئی ہیں اور 23 دسمبر 2025 سے 22 فروری 2026 تک مؤثر رہیں گی۔

احکامات کے تحت رات 10 بجے سے صبح 6 بجے تک شہر میں بھاری گاڑیوں کی آمد و رفت پر مکمل پابندی ہوگی، جبکہ تعمیراتی مواد لے جانے والے ڈمپرز صرف مخصوص اوقات میں چل سکیں گے، تاہم پانی، خوردنی تیل، مائع آکسیجن، مائع نائٹروجن، طبی گیسیں (زندگی بچانے والی ادویات)، گوشت، چمڑا اور دیگر متعلقہ اشیاء لے جانے والی گاڑیوں کو اس پابندی سے استثنیٰ حاصل ہوگا۔

نوٹیفکیشن کے مطابق جناح ایونیو پر بھاری ٹریفک کی آمد و رفت پر مکمل پابندی عائد ہے، جو سپر ہائی وے (ایم نائن) سے صائمہ پری کلاسیک اور روفی گلوبل سٹی کے قریب سے شروع ہو کر ملیر ہالٹ، شارع فیصل تک جاری رہے گی۔

ٹریفک کی روانی بحال رکھنے کے لیے بھاری گاڑیوں کےلیے مخصوص راستے بھی مقرر کیے گئے ہیں، جن میں نیو کراچی انڈسٹریل ایریا کے راستے سپر ہائی وے، چوڑنگی انٹر سیکشن کے راستے نیشنل ہائی وے، نارتھ بائی پاس اورآرسی ڈی ہائی وے شامل ہیں۔ علاوہ ازیں لنک روڈ (ایسٹرن بائی پاس) کے ذریعے کاٹھور، سپر ہائی وے (ایم نائن) اور نیشنل ہائی وے (این فائیو) کو متبادل راستہ قرار دیا گیا ہے۔

تعمیراتی مواد والے ڈمپرز جو کراچی ٹریفک پولیس کے مانیٹرنگ سسٹم سے مربوط منظور شدہ ٹریکنگ ڈیوائسز سے لیس ہوں انہیں صنعتی علاقوں میں پابندی کے اوقات سے مستثنیٰ رکھا گیا ہے۔

نوٹیفکیشن اسٹیشن ہاؤس افسران (تھانیداروں) اور ٹریفک پولیس اہلکاروں کو پابندی کی خلاف ورزی کرنے والوں کے خلاف سیکشن پی پی سی 188 کے تحت مقدمہ درج کرنے کا اختیار دیتا ہے۔

یہ اقدام کراچی کے ڈپٹی انسپکٹر جنرل پولیس (ٹریفک) کی درخواست پر کیا گیا ہے، جس میں کہا گیا کہ دن کے اوقات میں بھاری گاڑیوں کی بڑھتی ہوئی آمد و رفت کے باعث ٹریفک کی بھیڑ اور روڈ حادثات میں اضافہ ہو رہا ہے۔