مغربی افریقہ ایکسپو میں پاکستانی کمپنیوں کی بیوٹی پروڈکٹس کی نمائش

وزارتِ تجارت نے جمعرات کو بتایا ہے کہ بیوٹی ویسٹ افریقہ ایکسپو میں کل 19 پاکستانی کمپنیوں نے اپنی بیوٹی اور پرسنل کیئر کی مصنوعات کی نمائش کی۔

وزیرِ اعظم کے کوآرڈینیٹر برائے تجارت رانا احسان افضل خان نے اس ایکسپو میں پاکستان پویلین کا افتتاح کیا، جو براعظم کے سب سے بڑے تجارتی پروگراموں میں سے ایک ہے۔

وزارتِ تجارت کے تحت ٹریڈ ڈویلپمنٹ اتھارٹی آف پاکستان (ٹی ڈی اے پی) کے زیر اہتمام پویلین میں شامل کمپنیوں نے بیوٹی اور پرسنل کیئر کی مصنوعات کی وسیع رینج پیش کی۔

دورے کے دوران وزیرِ اعظم کے کوآرڈینیٹر برائے تجارت نے نائجیریا کی حکومت کے سینئر حکام سے بھی ملاقاتیں کیں، جن میں مس عائشہ ریمی، ایگزیکٹو ڈائریکٹر، نائجیریا انویسٹمنٹ پروموشن کمیشن (این آئی پی سی)؛ مسز نونی آئینی، ایگزیکٹو ڈائریکٹر، نائجیریا ایکسپورٹ پروموشن کونسل (این ای پی سی) اور سفیر نورا ابّا ریمی، پرمننٹ سیکریٹری، فیڈرل وزارت برائے صنعت، تجارت اور سرمایہ کاری (ایف ایم آئی ٹی آئی) شامل ہیں۔

بیان کے مطابق “گفتگو کے دوران دوطرفہ تجارت کو مضبوط بنانے، مارکیٹ تک رسائی کے مسائل حل کرنے، اور دونوں ممالک میں کاروبار کے لیے لاجسٹک اور مالی سہولتوں کو بہتر بنانے پر توجہ دی گئی۔”

بیان میں کہا گیا ہے کہ ٹی ڈی اے پی کے تعاون یافتہ نمائش کنندگان کے علاوہ، دیگر آزاد پاکستانی کمپنیوں نے بھی نمائش میں حصہ لیا، جو “افریقہ کی مارکیٹ میں پاکستان کے پرائیویٹ سیکٹر کی بڑھتی ہوئی دلچسپی” کو ظاہر کرتا ہے۔