امریکی ڈالر کے مقابلے روپے کی قدر میں اضافہ

انٹر بینک مارکیٹ میں بدھ کو امریکی ڈالر کے مقابلے پاکستانی روپے کی قدر میں مزید بہتری آئی ہے۔

کاروبار کے بند ہونے پر مقامی کرنسی ڈالر کے مقابلے 280.56 روپے پر بند ہوئی، امریکی ڈالر کے مقابلے میں ایک پیسے کا اضافہ ہوا۔

گزشتہ روز منگل کو مقامی کرنسی 280.57 پر بند ہوئی تھی۔

عالمی منڈی میں امریکی ڈالر بدھ کے روز کمزور ہوا، جس کی وجہ امریکہ کے اقتصادی اعداد و شمار کی مثبت صورتحال تھی جس نے دسمبر میں شرح سود میں کمی کی توقعات کو تقویت دی، اور سرمایہ کاروں نے یہ اندازہ لگایا کہ اگلے فیڈرل ریزرو چیئر کے امیدوار کی پالیسی نرم مزاج ہو سکتی ہے۔

منگل کے اعداد و شمار کے مطابق ستمبر میں امریکی ریٹیل سیلز توقع سے کم بڑھی جبکہ پروڈیوسر پرائسز توقعات کے مطابق رہیں۔

نومبر میں امریکی صارفین کے اعتماد میں بھی کمی دیکھی گئی کیونکہ گھریلو صارفین ملازمتوں اور مالی صورتحال کے حوالے سے فکر مند تھے۔

یہ تمام عوامل تاجروں کو اگلے ماہ فیڈ کی شرح سود میں کمی پر شرط لگانے پر مجبور کر رہے ہیں، مارکیٹس میں اب 25 بیسس پوائنٹس کمی کے امکانات 84 فیصد بتائے جا رہے ہیں، جس سے ڈالر پر دباؤ برقرار رہا۔

کمزور ڈالر کے مقابلے میں یورو 1.16 ڈالر کی سطح کے قریب پہنچ گیا اور آخری خریداری 1.1583 ڈالر پر ہوئی، جس میں روس اور یوکرین کے درمیان امن منصوبے میں پیش رفت کے اشارے نے ہلکی مدد کی۔

مختلف کرنسیوں کے مقابلے میں ڈالر 0.2 فیصد کی کمی کے ساتھ 99.67 پر آ گیا، جبکہ گزشتہ سیشن میں یہ 0.3 فیصد کمی کے بعد تین ہفتوں کی سب سے بڑی روزانہ کمی دیکھنے میں آئی تھی۔

تیل کی قیمتیں، جو کرنسی کی مساوات کا اہم اشارہ ہیں، بدھ کو مستحکم رہیں، جب کہ پچھلے سیشن میں ایک ماہ کی کم ترین سطح پر گرنے کے بعد سرمایہ کار اضافی رسد کے امکانات اور روس-یوکرین امن معاہدے پر مذاکرات کا جائزہ لے رہے تھے۔

برینٹ کروڈ فیوچرز عالمی معیاری وقت کے مطابق 9 بج کر 4 منٹ تک 5 سینٹ کی کمی کے ساتھ $62.43 فی بیرل پر پہنچ گئی۔

امریکی ویسٹ ٹیکساس انٹرمیڈیٹ (ڈبلیو ٹی آئی) کروڈ فیوچرز 1 سینٹ کے اضافے کے ساتھ $57.96 پر رہی۔