ڈالر کی نسبت روپیہ مزید مضبوط

انٹربینک مارکیٹ میں پیر کو بھی ڈالر کے مقابلے روپے کی قدر میں اضافے کا سلسلہ جاری رہا۔

کاروبار کے اختتام پر ڈالر کے مقابلے روپیہ 1 پیسے کی بہتری سے 281.01 روپے پر جاپہنچا۔

یاد رہے کہ گزشتہ ہفتے انٹربینک مارکیٹ میں ڈالر کے مقابلے میں روپیہ 8 پیسے کی بہتری سے 281.02 پر بند ہوا۔

بین الاقوامی سطح پر پیر کو امریکی ڈالر جاپانی ین کے مقابلے میں دو ہفتوں سے زائد کی بلند ترین سطح پر پہنچ گیا جب کہ یہ ہفتہ عالمی تجارتی مذاکرات اور مرکزی بینکوں کے اجلاسوں سے بھرپور آغاز کے ساتھ شروع ہوا۔

امریکی صدر ڈونلڈ ٹرمپ پیر سے جاپان کے دورے پر ہیں اور آئندہ روز جاپان کی نئی وزیرِاعظم، سَنائے تاکائچی، کے ساتھ ایک سربراہی اجلاس منعقد کریں گے۔

اس کے فوراً بعد جمعرات کو ٹرمپ کی ملاقات چینی صدر شی جن پنگ سے ہوگی، جہاں دونوں رہنما اتوار کو اپنے متعلقہ حکام کے درمیان طے پانے والے تجارتی معاہدے کے فریم ورک پر حتمی فیصلہ کریں گے۔

اور جب ٹرمپ اس ہفتے ایشیا کے دورے پر ہیں، تو جمعہ کو جاری ہونے والے معتدل افراطِ زر کے اعدادوشمار کے بعد یہ وسیع توقع کی جارہی ہے کہ امریکی فیڈرل ریزرو اپنی پالیسی شرحِ سود میں کمی کرے گا۔

ڈالر کی قدر 0.2 فیصد بڑھ کر 153.12 ین تک پہنچ گئی، جو 10 اکتوبر کے بعد سے بلند ترین سطح ہے۔

ڈالر انڈیکس معمولی تبدیلی کے ساتھ 98.94 پر برقرار ہے۔

تیل کی قیمتوں، جو کرنسی کی برابری کا ایک اہم اشاریہ سمجھا جاتا ہے، میں پیر کے روز اضافہ دیکھا گیا۔ امریکا اور چین کے اقتصادی حکام کے درمیان تجارتی معاہدے کے فریم ورک پر اتفاق رائے کے بعد یہ اضافہ سامنے آیا، جس سے دنیا کی دو بڑی تیل استعمال کرنے والی معیشتوں کے درمیان ٹیرف اور برآمدی پابندیوں کے باعث عالمی اقتصادی نمو متاثر ہونے کے خدشات میں کمی آئی۔

برینٹ خام تیل کے سودے 47 سینٹ (0.71 فیصد) اضافے کے ساتھ فی بیرل 66.41 ڈالر پر پہنچ گئے (0629 عالمی وقت تک)۔

امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل کے سودے 44 سینٹ (0.72 فیصد) بڑھ کر فی بیرل 61.94 ڈالر ہو گئے، جو گزشتہ ہفتے امریکا اور یورپی یونین کی جانب سے روس پر عائد پابندیوں کے بعد بالترتیب 8.9 فیصد اور 7.7 فیصد اضافے کے بعد مزید بہتری ظاہر کر رہے ہیں۔

انٹر بینک مارکیٹ میں پیر کے روز ڈالر کے نرخ: قیمت خرید: 281.01 روپے قیمت فروخت: 281.20 روپے