ملک میں شدید سردی کی پیش گوئی بے بنیاد قرار

محکمہ موسمیات (پی ایم ڈی) نے وضاحت کی ہے کہ ملک میں انتہائی سرد موسم سے متعلق گردش کرنے والی اطلاعات سائنسی طور پر بے بنیاد ہیں۔

پی ایم ڈی جو موسم اور آب و ہوا کی نگرانی کا واحد قومی ادارہ ہے نے یہ ردِعمل ان رپورٹس اور سوشل میڈیا پوسٹس کے بعد دیا ہے جن میں دعویٰ کیا گیا تھا کہ رواں موسمِ سرما میں پاکستان غیر معمولی سردی کا سامنا کرے گا۔

ادارے نے واضح کیا کہ اس کے موسمِ سرما کے تجزیے (دسمبر تا فروری) کے مطابق ملک کے بیشتر حصوں میں درجہ حرارت معمول سے قدرے زیادہ اور بارش معمول سے کم رہنے کا امکان ہے۔

بیان میں کہا گیا کہ اگرچہ مغربی ہوا کے گزرنے سے وقتی سرد لہریں آسکتی ہیں، مگر کسی غیر معمولی یا ریکارڈ توڑ سردی کے شواہد موجود نہیں۔

محکمے نے بتایا کہ موجودہ ماحولیاتی تجزیے بحرالکاہل میں کمزور تا معتدل لا نینا مرحلے کی نشاندہی کرتے ہیں، جو عموماً پاکستان اور خطے میں سردیوں کے نظام کی شدت کو کم کر دیتا ہے۔

اس سے شمالی و مغربی علاقوں میں برف باری کم جبکہ میدانی علاقوں میں درجہ حرارت معمولی فرق سے تبدیل ہوتا ہے۔

پی ایم ڈی کے مطابق جاری لا نینا مرحلہ پاکستان میں موسمِ سرما کو نسبتاً معتدل رکھے گا، اس کے برعکس جو افواہیں غیر معمولی سردی سے متعلق پھیلائی جا رہی ہیں۔

محکمے نے عوام اور میڈیا کو ہدایت کی کہ وہ صرف پی ایم ڈی کی سرکاری ویب سائٹ اور تصدیق شدہ ذرائع سے جاری کردہ پیش گوئیوں پر انحصار کریں، کیونکہ غیر مصدقہ اطلاعات عوامی پریشانی اور غلط فہمی کا باعث بنتی ہیں۔

قبل ازیں رواں سال جنوری میں بھی اسی نوعیت کی افواہیں سامنے آئی تھیں جن کی پی ایم ڈی نے تردید کرتے ہوئے کہا تھا کہ ریکارڈ توڑ سردی کے کوئی شواہد نہیں ہیں۔