ڈالر کے مقابلے روپے کی قدر میں معمولی بہتری

پاکستانی روپے کی قدر میں جمعرات کے روز امریکی ڈالر کے مقابلے میں معمولی بہتری دیکھی گئی۔

انٹر بینک مارکیٹ میں کاروبار کے اختتام پرامریکی ڈالر کے مقابلے میں مقامی کرنسی 0.01 روپے کے اضافے کے ساتھ 281.20 پر بند ہوئی۔

عالمی سطح پر جمعرات کے روز امریکی ڈالر مستحکم رہا اور تقریباً ایک سال میں اپنی بہترین ہفتہ وار کارکردگی کی راہ پر ہے۔ ڈالر کی مضبوطی کی ایک بڑی وجہ جاپانی کرنسی ین کی کمزوری بتائی جا رہی ہے، جو جاپان کی حکمران جماعت میں قیادت کی تبدیلی کے بعد دباؤ میں ہے۔

ین کی قدر میں اتار چڑھاؤ اس وقت دیکھا گیا جب سنانے تاکائچی کو جاپان کی لبرل ڈیموکریٹک پارٹی کی سربراہ نامزد کیا گیا، جو ملک کی پہلی خاتون وزیرِاعظم بننے کی راہ پر ہیں۔ اس پیش رفت نے سرکاری اخراجات میں اضافے اور نرم مالیاتی پالیسی کے امکانات کو بڑھا دیا ہے۔

جاپانی ین فی ڈالر 152.49 پر معمولی بہتری کے ساتھ ٹریڈ کر رہا تھا، جبکہ گزشتہ رات یہ 153 فی ڈالر کی آٹھ ماہ کی کم ترین سطح تک گر گیا تھا۔ رواں ہفتے کے دوران ین کی قدر میں 3 فیصد سے زیادہ کمی آ چکی ہے، جو ستمبر 2024 کے بعد سے اس کی سب سے کمزور کارکردگی ہے۔

کرنسیوں کی مجموعی ٹوکری کے مقابلے میں ڈالر کی قدر 98.77 پر تقریباً بغیر تبدیلی کے ساتھ مستحکم رہی۔

امریکی فیڈرل ریزرو کے حالیہ اجلاس کی تفصیلات کے مطابق، حکام نے تسلیم کیا کہ امریکی روزگار مارکیٹ کے خطرات میں اضافہ ہوا ہے، جس کی وجہ سے شرحِ سود میں کمی پر غور کیا جا رہا ہے، تاہم وہ اب بھی افراطِ زر کے بلند رہنے پر محتاط ہیں۔

دوسری جانب، کرنسی مارکیٹ کے ایک اہم اشاریے کے طور پر عالمی تیل کی قیمتوں میں کمی دیکھی گئی۔ جمعرات کے روز اسرائیل اور حماس کے درمیان غزہ جنگ کے خاتمے کے پہلے مرحلے پر اتفاق کے بعد جغرافیائی کشیدگی میں کچھ کمی آئی۔

برینٹ کروڈ فیوچرز کی قیمت 34 سینٹ (0.51 فیصد) کم ہو کر فی بیرل 65.91 ڈالر پر آگئی، جبکہ امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل 38 سینٹ (0.61 فیصد) کمی کے ساتھ 62.17 ڈالر فی بیرل پر ٹریڈ ہوا۔