گوبی پارٹنرز کی پاکستان کے ڈیجیٹل شعبے کو مضبوط بنانے میں دلچسپی

گوبی پارٹنرز نے پاکستان میں ای کامرس اور فنانشل ٹیکنالوجیز کے شعبے میں اشتراک میں گہری دلچسپی کا اظہار کیا ہے۔

گو بی پارٹنرز ایک معروف وینچر کیپیٹل فرم ہے جس کا صدر دفتر ملائیشیا میں واقع ہے، یہ ابھرتی ہوئی مارکیٹس اور کم سہولت یافتہ کاروباری افراد میں ابتدائی سے ترقی کے مراحل تک سرمایہ کاری پر توجہ مرکوز کرتی ہے۔

وزیراعظم شہباز شریف سےملائیشیا کے بزنس گروپ کے ایک وفد نے منگل کو فاؤنڈر اور چیئر تھامس ساؤ کی قیادت میں ملاقات کی۔

ملاقات کے دوران وزیراعظم نے کہا کہ پاکستان اور ملائیشیا کے اقتصادی اور تجارتی شعبوں میں تعاون کو بڑھانے کی بے پناہ صلاحیت موجود ہے جس کے لیے دونوں فریق مخصوص اقدامات کررہے ہیں۔

وزیراعظم نے کہا کہ گو بی پارٹنرز کا پاکستان کے اسٹارٹ اپ ایکو سسٹم پر اعتماد ایک خوش آئند علامت ہے اور حکومت اسٹارٹ اپس اور ابتدائی مرحلے کے سرمایہ کاروں کی حمایت کے لیے سرمایہ کاری کی سہولت اور بنیادی ڈھانچے تک بہتر رسائی کے ذریعے ہدفی اصلاحات پر کام کررہی ہے۔

انہوں نے کہا کہ اسپیشل انویسٹمنٹ فیسلیٹیشن کونسل غیر ملکی سرمایہ کاروں کو ہر ممکن تعاون اور سہولت فراہم کررہی ہے۔

وزیراعظم نے کہا کہ ایک مستحکم اسٹارٹ اپ ایکو سسٹم قائم کرنے کے لیے بین الاقوامی اور ملکی سرمایہ دونوں کو متحرک کرنا ہماری اولین ترجیح ہے۔

انہوں نے مزید کہا کہ ڈیجیٹل معیشت خاص طور پر فِن ٹیک، ای کامرس، اور آئی ٹی سروسزہماری قومی ترقی کی حکمت عملی میں مرکزی حیثیت رکھتی ہے۔