زِندگی نے ویزا ورچوئل ڈیبٹ کارڈ متعارف کرادیا

زِندگی، جو جے ایس بینک کے تعاون سے چلائی جا رہی ہے، نے اپنا ویزا ورچوئل ڈیبٹ کارڈ متعارف کرا دیا ہے—یہ ایک محفوظ اور مکمل طور پر ڈیجیٹل ادائیگی کا حل ہے جو زِندگی ایپ کے ذریعے چند لمحوں میں جاری کیا جا سکتا ہے۔ یہ ورچوئل کارڈ صارفین کو فزیکل کارڈ کے بغیر ہی مقامی و بین الاقوامی سطح پر باآسانی اور محفوظ طریقے سے لین دین کی سہولت فراہم کرتا ہے، جو پاکستان کے فِن ٹیک شعبے میں ایک اہم پیش رفت قرار دی جا رہی ہے۔

یہ کارڈ سہولت اور سیکیورٹی کو مرکزی حیثیت دیتا ہے۔ صارفین صرف ایک کلک کے ذریعے کارڈ تیار کرسکتے ہیں، اسے فوری طور پر آن لائن خریداری یا بین الاقوامی خدمات کے لیے استعمال میں لا سکتے ہیں، اور فراڈ سے تحفظ کے لیے تھری ڈی سیکیور آتھورائزیشن کا فائدہ اٹھا سکتے ہیں۔ اس کے ساتھ ساتھ صارفین کو کارڈ کو بوقتِ ضرورت بلاک یا ان بلاک کرنے، مقامی اور بین الاقوامی ٹرانزیکشنز کے درمیان سوئچ کرنے اور اخراجات کی حد مقرر کرنے کی سہولت بھی دی گئی ہے۔

زِندگی کے چیف پروڈکٹ آفیسر فیصل خالد کے مطابق زِندگی میں ہمارا ہدف صارفین کی زندگی کو آسان اور خودمختار بنانا ہے۔ ویزا ورچوئل ڈیبٹ کارڈ صرف ایک پراڈکٹ نہیں بلکہ ڈیجیٹل آزادی کی جانب ایک قدم ہے جو صارفین کو دنیا بھر میں فوری، محفوظ اور مکمل مالی کنٹرول کے ساتھ لین دین کی طاقت فراہم کرتا ہے۔

زِندگی کی یہ نئی پیش رفت اس کے اُس مشن کی عکاسی کرتی ہے جس کا مقصد پاکستان کے مالیاتی نظام کو جدید تقاضوں سے ہم آہنگ کرنا ہے۔ ملک کی سب سے زیادہ ڈاؤن لوڈ کی جانے والی مالیاتی ایپس میں شامل زِندگی نے ویلتھ مینجمنٹ میں جدت لانے کے ساتھ ساتھ اپنی ایپ میں اسٹاک ٹریڈنگ، امریکی ڈالر پر مبنی فری لانسر اکاؤنٹ، اور حسبِ ضرورت بینکاری جیسی جدید سہولیات متعارف کروا کر ڈیجیٹل بینکاری کے شعبے میں نئی راہیں کھولی ہیں۔

کاپی رائٹ بزنس ریکارڈر 2025