دلیرانہ بجٹ کی خواہش، حقیقت میں مایوسی کا منظر

وزیرِ خزانہ محمد اورنگزیب آئندہ بجٹ کو ایک دلیرانہ بجٹ قرار دے رہے ہیں تاہم ایف بی آر (فیڈرل بورڈ آف ریونیو) پسِ پردہ ایسے فرسودہ اورسہل پسندانہ ٹیکس عائد کرنے کی کوشش میں ہے جنہیں کسی بھی طور دلیرانہ نہیں کہا جا سکتا۔

ٹیکس مشینری بدستور صرف ریونیو اکٹھا کرنے پر مرکوز ہے بغیر اس کے کہ ٹیکس نیٹ کو وسیع کیا جائے اور اس طرزِ عمل کے نتیجے میں باضابطہ معیشت کا گلا گھٹ رہا ہے،اس کی ایک نمایاں مثال حکومت کی آخری لمحوں میں یہ کوشش ہے کہ قابلِ انتقال اثاثوں—جیسے نقدی اور سونے—پر کیپٹل ویلیو ٹیکس (سی وی ٹی) عائد کیا جائے جس پر آئی ایم ایف نے بروقت اور بجا اعتراض اٹھایا۔

حکومت کا طرزِ فکر بظاہر یہ ہے کہ عوامی مقبولیت حاصل کرنے کیلئے ریلیف دیا جائے اور آمدن میں پیدا ہونے والی کمی کو عارضی اور غیر منطقی تجاویز کے ذریعے پورا کیا جائے۔ ٹیکس نیٹ کو وسعت دینے یا کم ٹیکس دہندگان اور غیر ٹیکس شدہ شعبوں کو نیٹ میں شامل کرنے کی کوئی سنجیدہ کوشش نظر نہیں آتی۔

اسی وقت حکومت بینک ڈپازٹس اور میوچل فنڈز میں سرمایہ کاری سے حاصل ہونے والی آمدنی پر ودہولڈنگ ٹیکس (ڈبلیو ایچ ٹی) کی شرح بڑھانے کی تجویز بھی دے رہی ہے اور ساتھ ہی نقدی پر کیپٹل ویلیو ٹیکس (سی وی ٹی) عائد کرنے کی کوشش کررہی ہے،ایسے اقدامات معیشت کو مزید غیر رسمی بنانے کا سبب بنیں گے، لوگ بینکوں سے رقوم نکال کر انہیں سونے، غیر ملکی کرنسی یا حتیٰ کہ گھروں میں چھپانے کو ترجیح دیں گے جس سے باضابطہ مالیاتی نظام کو شدید نقصان پہنچے گا۔

پاکستان کا ٹیکس نظام پہلے ہی انتہائی رجعت پسند (ریگریسیو) ہے، جہاں سیلز ٹیکس کی شرح دنیا میں بلند ترین شرحوں میں سے ایک ہے اور مختلف اشیا و خدمات پر فیڈرل ایکسائز ڈیوٹی (ایف ای ڈی) اور ودہولڈنگ ٹیکس (ڈبلیو ایچ ٹی) بھی بڑے پیمانے پر نافذ ہیں، جو سیلز ٹیکس اور ویلیو ایڈڈ ٹیکس (وی اے ٹی) کے طرز پر عائد فیڈرل ایکسائز ڈیوٹی کے ساتھ بیک وقت وصول کیے جارہے ہیں۔ آمدنی ٹیکس کا بڑا حصہ بھی درآمدی مرحلے پر ہی وصول کرلیا جاتا ہے۔

اب ویلتھ ٹیکس کی تجویز بوجھ میں ایک اور تہہ کا اضافہ ہے — یہ کوئی اصلاح نہیں بلکہ مزید تنزلی (ریگریشن) ہے۔ اس سے پہلے حکومت نے غیر ملکی اثاثوں پر کیپٹل ویلیو ٹیکس (سی وی ٹی) نافذ کیا تھا، جن میں وہ اثاثے بھی شامل تھے جو ایمنسٹی اسکیم کے تحت ظاہر کیے گئے تھے — حالانکہ حکومت نے واضح طور پر یہ وعدہ کیا تھا کہ مخصوص ٹیکس ادا کرنے کے بعد ایسی دولت کو جائز تسلیم کیا جائے گا۔ بعد ازاں حکومت نے اس وعدے سے انحراف کیا، جس کے نتیجے میں اب یہ سی وی ٹی عدالت میں چیلنج کیا جا رہا ہے۔

جنہوں نے اپنی دولت ظاہر کی، وہ خود کو دھوکہ خوردہ محسوس کر رہے ہیں، جبکہ جنہوں نے اثاثے چھپائے وہ فائدے میں ہیں۔ اب صورت حال یہ ہے کہ جن افراد نے اپنے اثاثے مکمل طور پر ظاہر کیے اور باقاعدہ ٹیکس بھی ادا کیا، اُنہیں بھی غیر رسمی معیشت کی طرف دھکیلا جا رہا ہے۔ ایف بی آر جس نوعیت کے ٹیکس تجویز کررہا ہے وہ معیشت کے غیر شفاف (گرے) شعبوں کو مزید وسعت دینے کا سبب بنیں گے۔

یہ کہنے کی ضرورت نہیں کہ پاکستان پہلے ہی انتہائی کم بچت کی شرح کا شکار ہے، جس کے نتیجے میں سرمایہ کاری کی سطح بھی نہایت کم ہے۔ بچت اور سرمایہ کاری کے درمیان یہی خلا جاری کھاتوں کے خسارے کو جنم دیتا ہے، جو بار بار ادائیگیوں کے توازن کے بحران کا سبب بنتا ہے۔ رجعت پسندانہ ٹیکس اقدامات اس رجحان کو مزید بگاڑ دیں گے اور بچت کی حوصلہ شکنی کریں گے۔ اسی طرح، بڑی آمدنی پر جاری بھاری ٹیکسز، بشمول سپر ٹیکس، سرمایہ کاری اور سرمائے کے ارتکاز کی راہ میں ایک بڑی رکاوٹ ہیں۔ اب ویلتھ ٹیکس کی گونج مزید بےیقینی پیدا کر رہی ہے اور سرمایہ کاروں کے اعتماد کو شدید دھچکا پہنچا رہی ہے۔

اصل مسئلہ یہ ہے کہ حکومت کا رویہ بظاہر یہ ہے کہ جو کچھ بھی دستاویزی شکل میں موجود ہے، اسے ہی ہر ممکن طریقے سے ٹیکس کے دائرے میں لے آیا جائے — محض اعداد و شمار کے خانوں کو پُر کرنے کی سوچ کے تحت۔ اس طرزِ فکر اور زبردستی کے ہتھکنڈوں سے ریاست اور ٹیکس دہندگان کے درمیان اعتماد کا رشتہ کمزور ہو رہا ہے اور ٹیکس نیٹ کو وسعت دینے کی کوششیں بری طرح متاثر ہو رہی ہیں۔ نتیجتاً، مقامی سرمایہ کار اور خاندانی کاروباری گروپس اپنا سرمایہ بیرونِ ملک منتقل کررہے ہیں جبکہ پیشہ ور تنخواہ دار افراد بہتر مواقع کے لیے پاکستان سے باہر ملازمتیں تلاش کررہے ہیں۔

صلاحیت اور سرمایہ، دونوں ملک سے باہر جارہے ہیں۔ یہ رجحان نجکاری کی کوششوں کے لیے ایک سنگین خطرہ بن چکا ہے، خاص طور پر اس لیے کہ ماضی کا تجربہ بتاتا ہے کہ جب بھی مقامی سرمایہ کاروں نے مناسب منافع کمایا — جیسا کہ آئی پی پیز (آئی پی پی) کے معاملے میں ہوا — تو ریاست اپنے وعدوں سے مکر گئی۔ اس پس منظر میں سرمایہ کاروں کا اعتماد مزید متزلزل ہو رہا ہے۔

دوسری طرف غیر ملکی سرمایہ کاروں کو بعض اوقات یہی سلوک برداشت نہیں کرنا پڑا۔ اس عدم مساوات کی وجہ سے مقامی سرمایہ کار بجلی کی تقسیم کار کمپنیوں (ڈسکوز) کی بولی میں دلچسپی لینے سے کتراتے ہیں جب تک کہ وہ غیر ملکی شراکت داروں کی حمایت حاصل نہ کریں۔ تاہم، غیر ملکی سرمایہ کاری کا رجحان بھی کمزور ہی رہا ہے، جیسا کہ کے الیکٹرک کے شیئر ہولڈرز کی مثال ہے جنہیں 20 سالوں میں ایک بھی روپے کا ڈیویڈنڈ نہیں ملا۔

حکومت کو فوری طور پر سرمایہ کاروں کے اعتماد کو بہتر بنانے اور سرمایہ کاری کے لیے سازگار ماحول فراہم کرنے کی ضرورت ہے۔ تاہم، موجودہ حکمت عملی — باضابطہ شعبے سے زیادہ سے زیادہ آمدنی حاصل کر کے غیر رسمی شعبے کو غیر مستقیم طور پر سبسڈی دینا — مسئلے کو مزید سنگین بنا رہی ہے۔ اگر حکومت واقعی دلیرانہ اقدامات کرنا چاہتی ہے تو اسے درست راہ اپنانی ہوگی: اعتماد قائم کرنا، ٹیکس نیٹ کو منصفانہ طور پر وسیع کرنا، اور ایسی پالیسیاں بنانا جو پائیدار اور شامل اقتصادی ترقی کو فروغ دیں۔

کاپی رائٹ بزنس ریکارڈر 2025