پاکستان، بھارت، نیپال میں چینی سفارتخانوں کا اپنے شہریوں کو محتاط رہنے کا مشورہ

پاکستان اور بھارت میں چینی سفارت خانوں نے اپنے شہریوں کو مشورہ دیا ہے کہ وہ نئی دہلی اور اسلام آباد کے درمیان کشیدگی کے سبب حفاظتی احتیاطی تدابیر اختیار کریں اور جنوبی ایشیائی ممالک کا سفر کرتے ہوئے محتاط رہیں۔

گزشتہ ماہ مقبوضہ کشمیر میں ہندو سیاحوں پر حملے کے جواب میں بھارت کی جانب سے بدھ کے روز پاکستان میں متعدد مقامات کو نشانہ بنائے جانے کے بعد دونوں ممالک کے درمیان جھڑپیں جاری ہیں۔

سفارت خانوں کی جانب سے جاری ہونے والے الگ الگ بیانات میں کہا گیا ہے کہ پاکستان اور بھارت میں موجود چینی شہریوں کو صورتحال پر گہری نظر رکھنی چاہیے اور حفاظتی تدابیر میں اضافہ کرنا چاہیے۔

نیپال میں بیجنگ کے سفارت خانے نے بھی جمعہ کے روز اپنے سوشل میڈیا اکاؤنٹ پر پوسٹ کیے گئے ایک بیان میں شہریوں کو مشورہ دیا ہے کہ وہ نیپال-بھارت سرحد سے متصل علاقوں کا سفر کرنے سے گریز کریں۔

بیان میں مزید کہا گیا ہے کہ نیپال اور بھارت کے درمیان سرحد کھلی ہے اور چینی شہریوں کو چاہیئے کہ وہ وہاں کا سفر کرنے سے گریز کریں تاکہ غلطی سے سرحد پار کرنے کا اندیشہ نہ ہو، بھارت اور نیپال دونوں نے بڑھتی ہوئی کشیدگی کے درمیان اپنی سرحد پر سیکورٹی سے متعلق کوششیں تیز کردی ہیں۔