ٹرمپ ٹیرف پر حکومت کا جوابی اقدام نہ کرنے کا فیصلہ

وفاقی وزیر خزانہ محمد اورنگزیب نے کہا ہے کہ پاکستان کا امریکی صدر ڈونلڈ ٹرمپ کی انتظامیہ کی جانب سے عائد کردہ ٹیرف پر جوابی اقدام کرنے کا کوئی ارادہ نہیں ہے۔

بی بی سی کو دیے گئے ایک انٹرویو میں وزیر خزانہ نے تسلیم کیا کہ ٹرمپ دور کے یہ ٹیرف پاکستان کے لیے تشویش کا باعث ہیں کیونکہ انہوں نے غیر یقینی کی فضا پیدا کر دی ہے۔

انہوں نے کہا کہ ہم سب کو یہ سوچنے کی ضرورت ہے کہ اس نئے عالمی نظام میں کس طرح آگے بڑھنا ہے، اور میرے خیال میں اس معاملے پر بات چیت بہت ضروری ہے۔

ایک سوال کے جواب میں محمد اورنگزیب نے وضاحت کی کہ اگر سوال یہ ہے کہ کیا پاکستان اس کے جواب میں کوئی اقدام کرے گا، تو اس کا جواب نفی میں ہے۔

امریکہ اور چین کے درمیان جاری تجارتی کشیدگی کے تناظر میں پاکستان کو ممکنہ نقصان پہنچنے سے متعلق خدشات پر بات کرتے ہوئے وزیر خزانہ نے کہا کہ امریکہ طویل عرصے سے پاکستان کا اسٹریٹجک شراکت دار رہا ہے، تاہم چین کے ساتھ تعلقات بھی پاکستان کے لیے یکساں اہمیت رکھتے ہیں۔

یہ امر قابل ذکر ہے کہ گزشتہ ہفتے امریکی صدر ڈونلڈ ٹرمپ نے متعدد ممالک پر نئے ٹیرف عائد کرنے کا اعلان کیا تھا، جن میں ابتدائی طور پر پاکستانی برآمدات پر 29 فیصد ٹیرف شامل تھا۔

تاہم حالیہ اعلان کے بعد ان ٹیرف کے نفاذ کو 90 دنوں کے لیے مؤخر کر دیا گیا ہے، البتہ تمام ممالک پر کم از کم 10 فیصد ٹیرف اب بھی لاگو ہوگا۔