پنجاب حکومت کی جانب سے پارا چنار کیلئے ادویات اور دیگر اشیائے ضروریہ روانہ

وزیراعلیٰ پنجاب مریم نواز نے پاراچنار کے عوام کو ادویات کی فراہمی کا وعدہ پورا کردیا۔

وزیر اعلیٰ پنجاب مریم نواز کی ہدایت پر ادویات اور اشیائے ضروریہ سمیت 41 اشیائے ضروریہ کی دوسری کھیپ پارا چنار روانہ کردی گئی۔ وزیر اعلیٰ مریم نواز نے مزید 5 ٹرک فراہم کرنے کے لیے ضروری اقدامات کا حکم دے دیا۔

مریم نواز نے 19 دسمبر کو کابینہ کے اجلاس میں پاراچنار کے لوگوں کے رابطہ کرنے پر ادویات اور دیگر ضروری سامان بھجوانے کی ہدایت کی تھی۔

صوبائی وزراء صحت خواجہ سلمان رفیق، خواجہ عمران نذیر اور سیکرٹری ایمرجنسی سروسز ڈاکٹر رضوان نصیر نے پاراچنار میں ادویات کی منتقلی کے عمل کی نگرانی کی۔

حکام کے مطابق مزید ادویات پاراچنار بھیجی جا رہی ہیں۔ ضروری ادویات میں انسولین، کتے کے کاٹنے کی ویکسین، دیگر زندگی بچانے والی ادویات اور ضروری سامان سمیت 24 اشیاء شامل ہیں۔ اب تک ضروری ادویات کی 12 بڑی کھیپ پاراچنار پہنچ چکی ہے جبکہ مزید ادویات کی ترسیل کے انتظامات مکمل کر لیے گئے ہیں۔

وزیر اعلیٰ مریم نواز شریف کی ہدایت پر پاراچنار سے تعلق رکھنے والے معمر مریض کو فوری آپریشن کے لیے پنجاب ایئر ایمبولینس سروس کے ذریعے اسلام آباد منتقل کردیا گیا۔

ضلع کرم سے تعلق رکھنے والے 60 سالہ مریض کے بیٹے ذیشان حیدر نے وزیر اعلیٰ مریم نواز شریف کا شکریہ ادا کیا اور ایئر ایمبولینس سروس کو سراہا۔

مریم نواز کا کہنا تھا کہ کرم کے عوام مشکل میں ہیں، یہ سیاست نہیں، خدمت کا وقت ہے۔

انہوں نے کہا کہ میں دعا کرتی ہوں کہ حالات جلد معمول پر آجائیں اور زندگی معمول پر آجائے۔ پاراچنار کے لوگ ہمارے ہیں، ہم انہیں مشکل میں اکیلا نہیں چھوڑ سکتے اور عوام کی ضروریات کے مطابق کرم میں موبائل ہیلتھ یونٹ بھی بھیجا جائے گا۔

انہوں نے کہا کہ اگر ضرورت پڑی تو ایئر ایمبولینس سروس کے ذریعے مزید مریضوں کو پاراچنار سے راولپنڈی منتقل کیا جائے گا، قائد نواز شریف نے انہیں خصوصی طور پر ہدایت کی ہے کہ پاراچنار کے عوام کی مدد کریں اور پاراچنار کے بھائیوں اور بہنوں کی ہر ممکن مدد کی جائے گی۔

وزیراعلیٰ پنجاب نے کہا کہ ایئر ایمبولینس سروس شروع کرنے کا مقصد بروقت اور فوری امداد فراہم کرنا ہے اور مشکل میں پھنسے لوگوں کی مدد کرنا ان کا نصب العین ہے۔