اسٹاک ایکسچینج نے ایک لاکھ پوائنٹس کا تاریخی سنگ میل عبور کرلیا، کے ایس ای 100 نے 17 ماہ میں 142 فیصد منافع فراہم کیا

کے ایس ای 100 انڈیکس نے جمعرات کو ایک لاکھ پوائنٹس کا تاریخی سنگ میل حاصل کرلیا ہے اور اس نے گزشتہ 17 ماہ کے دوران 142 فیصد منافع فراہم کیا ہے۔

یہ کامیابی سرمایہ کاروں کے بڑھتے اعتماد ، بہتر مالیاتی اور مانیٹری پالیسیوں، اور ایک سازگار اقتصادی ماحول کی عکاسی کرتی ہے۔

جمعرات کو کاروبار کے اختتام پر بینچ مارک انڈیکس 813.52 پوائنٹس کے اضافے کے ساتھ 100,082.77 پوائنٹس پر بند ہوا جو کہ گزشتہ روز 99,269.25 پوائنٹس پر بندش سے بھی بلند سطح ہے۔

یہ تیزی افراطِ زر میں کمی اور شرح سود میں کمی کے آثار کے درمیان سامنے آئی ہے جس نے مارکیٹ کی لیکویڈیٹی کو بڑھایا اور بے مثال منافع کو جنم دیا۔

گزشتہ پانچ سالوں میں پاکستان اسٹاک ایکسچینج (پی ایس ایکس) روپے کے اعتبار سے سالانہ 20.9 فیصد اور امریکی ڈالر کے اعتبار سے 7.7 کا منافع فراہم کیا ہے جو اس کی مضبوطی اور مقبولیت کو اجاگر کرتا ہے۔

پی ایس ایکس کے ایم ڈی اور سی ای او فرخ سبزواری نے کہا کہ کے ایس ای 100 انڈیکس کا ایک لاکھ کی حد عبور کرنا پاکستان اسٹاک ایکسچینج کے لئے فخر کا لمحہ ہے اور ہمارے سرمایہ کاروں کے اعتماد اور ملکی معیشت کی ترقی کا ثبوت ہے۔

انہوں نے خیال ظاہر کیا کہ یہ سنگ میل کیپٹل مارکیٹ کی صلاحیت کو ظاہر کرتا ہے۔

انہوں نے کہا کہ ہمارا مقصد پائیدار ترقی کو فروغ دینا ہے اور اپنی مارکیٹ کو وسیع تر بنانے کیلئے کام کرنا ہے کیوں کہ یہ ملک کے وسیع تر اقتصادی مفاد میں ہے۔

انہوں نے کہا کہ خوردہ سرمایہ کاروں کی شرکت کو بڑھانا ایک اہم ترجیح ہے، کیونکہ اس سے شمولیت اور لچک کو فروغ ملے گا جس سے ملکی معیشت کے ساتھ ساتھ مارکیٹ میں بھی اضافہ ہوگا۔

انہوں نے مزید کہا کہ آگے کا سفر اس بات کا متقاضی ہے کہ لسٹڈ کمپنیوں کا دائرہ وسیع کیا جائے، خاص طور پر ان شعبوں سے جن کی نمائندگی کم ہے۔

انہوں نے مزید کہا کہ اس اقدام کا مقصد پاکستان کی مارکیٹ کیپٹلائزیشن اور جی ڈی پی کے تناسب کو بہتر بنانا، معاشی نمو کو مزید تقویت دینا اور طویل مدتی سرمایہ کاری کو راغب کرنے کی مارکیٹ کی صلاحیت میں اضافہ کرنا ہے۔

گورنر سندھ کامران ٹیسوری نے تاریخی سنگ میل حاصل کیے جانے کی خوشی میں پی ایس ایکس کا دورہ کیا اور پی ایس ایکس انتظامیہ کو مبارکباد پیش کی۔