وزیراعظم کی اسپیکر قومی و صوبائی اسمبلی کو پی پی تحفظات دور کرنے کی ہدایت

وزیراعظم شہباز شریف نے قومی اور پنجاب اسمبلی کے اسپیکرز کو پاکستان پیپلز پارٹی کے تحفظات دور کرنے میں اپنا کردار ادا کرنے کی ہدایت کردی۔

پارٹی ذرائع کے مطابق وزیراعظم کی زیر صدارت ماڈل ٹاؤن میں مشاورتی نشست ہوئی جس میں ملک کی سیاسی صورتحال پر بات چیت کی گئی۔

اجلاس میں قومی اسمبلی کے اسپیکر سردار ایاز صادق اور پنجاب اسمبلی کے اسپیکر ملک محمد احمد خان نے بھی شرکت کی۔

ذرائع کے مطابق، شہباز شریف نے دونوں اسپیکروں کو پی پی پی کے تحفظات حل کرنے کے لیے اپنا کردار ادا کرنے کی ہدایت کی۔

اس سے قبل، وزیر اعظم نے پی پی پی کے مسائل حل کرنے کے لیے ایک کمیٹی تشکیل دی تھی۔

کمیٹی کے ارکان میں نائب وزیر اعظم اسحاق ڈار، وزیر دفاع خواجہ آصف، وزیر قانون اعظم نذیر تارڑ اور وزیر اقتصادی امور احمد خان چیمہ شامل ہیں۔

کمیٹی کے دیگر ارکان میں وزیر برائے کشمیر امور اور گلگت بلتستان انجینئر امیر مقام، وزیر اعظم کے مشیر رانا ثناء اللہ، پنجاب اسمبلی کے اسپیکر ملک احمد خان، سینئر پنجاب وزیر مریم اورنگزیب، پی ایم ایل این کے رہنما خواجہ سعد رفیق، جعفر خان مندوخیل اور بشیر احمد میمن شامل ہیں۔

وزیراعظم نے کمیٹی کو پی پی پی کے ساتھ تفصیلی مشاورت کرنے کی ذمہ داری سونپی ہے تاکہ سیاسی تعاون کو یقینی بنایا جاسکے اور مسائل حل کیے جاسکیں۔

کمیٹی پی پی پی کی طرف سے نامزد کردہ ارکان کے ساتھ مذاکرات کرے گی تاکہ مستقبل کی حکمت عملی کو حتمی شکل دی جاسکے۔