وزیراعظم شہبازشریف سے معروف برآمد کنندگان کے وفد نے ملاقات کی ۔ وفد نے صنعتوں کے لئے بجلی کے نرخوں میں کمی کے حوالے سے وزیر اعظم اور حکومت پاکستان کی تعریف کی اور اسے صنعتی اور برآمدی شعبے کے لئے تازہ ہوا کا جھونکا قرار دیا۔
وفد نے حکومت کی معاشی پالیسیوں پر مکمل اعتماد کا اظہار کیا اور حکومت کے ساتھ ہر ممکن تعاون کی یقین دہانی کرائی۔ انہوں نے کہا کہ وہ ملکی خزانے کو نقصان پہنچانے والوں اور ٹیکس چوروں کو سزا دینے میں حکومت کے ساتھ کھڑے ہیں۔
وفد کے شرکاء سے گفتگو کرتے ہوئے وزیراعظم نے کہا کہ برآمدات معیشت میں ریڑھ کی ہڈی کی حیثیت رکھتی ہیں۔ انہوں نے کہا کہ ملک اسی وقت ترقی کرے گا جب برآمدی شعبہ تیز رفتار اور پائیدار ترقی کی جانب بڑھے گا۔
انہوں نے مزید کہا کہ برآمد کنندگان قابل احترام ہیں اور ملک کی ترقی میں انتہائی اہم کردار ادا کر رہے ہیں ۔ انہوں نے کہا کہ غیر روایتی برآمدات کو فروغ دینے کیلئے تمام سہولتیں فراہم کی جارہی ہیں۔
وزیراعظم نے کہا کہ آج ہمیں وہ فیصلے کرنے ہیں جو ملک و قوم کے مفاد میں ہوں ۔ انہوں نے کہا کہ برآمدات اور جی ڈی پی کا تناسب بڑھے گا ۔ انہوں نے کہا کہ حکومت صنعتکاروں اور تاجروں کو سیلز ٹیکس ریفنڈ کی بروقت ادائیگی کو یقینی بنا رہی ہے۔
انہوں نے متعلقہ حکام کو ہدایت کی کہ اس سلسلے میں کسی قسم کی کوتاہی برداشت نہ کی جائے گی، تاجروں اور صنعتکاروں کو دستیاب وسائل کے اندر رہتے ہوئے ہر ممکن سہولتیں فراہم کی جائیں گی۔
وزیراعظم نے وفاقی وزراء کو ہدایت کی کہ وہ برآمد کنندگان کے تمام مسائل کے فوری حل کیلئے وفد سے بات چیت کریں۔
اجلاس میں وفاقی وزیر خزانہ محمد اورنگزیب، وفاقی وزیر پٹرولیم مصدق ملک، وفاقی وزیر توانائی اویس احمد خان لغاری، وزیر مملکت برائے خزانہ و ریونیو علی پرویز ملک، وزیر مملکت برائے انفارمیشن ٹیکنالوجی و ٹیلی کام شزا فاطمہ، سلمان احمد اور متعلقہ حکام نے شرکت کی۔ اجلاس میں متعلقہ سرکاری افسران نے بھی شرکت کی۔
کاپی رائٹ بزنس ریکارڈر، 2024
Comments
Comments are closed.