صوبائی امور پر وفاق کے اخراجات

سینیٹ کی قائمہ کمیٹی برائے ڈیولوشن کو بتایا گیا کہ وفاقی حکومت نے 17 ایسے شعبوں پر 5 کھرب روپے خرچ کیے جن میں تعلیم، صحت، ماحولیات، زراعت، لیبر اور صنعتیں شامل ہیں۔ یہ شعبے 2010 میں 18ویں آئینی ترمیم کے تحت صوبوں کو منتقل کردیے گئے تھے۔

لہٰذا یہ اخراجات واضح طور پر آئین کی خلاف ورزی کے زمرے میں آتے ہیں۔ تاہم حیران کن امر یہ ہے کہ 2010 میں اتفاقِ رائے سے 18ویں ترمیم کی منظوری کے 16 سال گزرنے کے باوجود اس سے متعلق خامیوں کو دور کرنے کے بجائے، بالخصوص منتقل کیے گئے شعبوں کی ذمہ داریاں نبھانے کیلئے صوبوں کی استعداد کار بڑھانے پر توجہ نہیں دی گئی۔ اس کے برعکس 2010 کے بعد آنے والی تمام حکومتوں نے اسی سال نافذ کیے گئے قومی مالیاتی کمیشن (این ایف سی) ایوارڈ پر عملدرآمد جاری رکھا، جس کے تحت وفاقی قابلِ تقسیم محاصل میں صوبوں کا حصہ بڑھا دیا گیا۔ نتیجتاً وفاقی حکومت کو اپنے اخراجات پورے کرنے کے لیے شدید مالی وسائل کی قلت کا سامنا کرنا پڑا۔

صوبوں میں منتقل کیے گئے شعبوں کی ذمہ داریاں نبھانے کے لیے استعداد کار میں اضافے تک اس مالیاتی کمی کو پورا کرنے کی غرض سے وفاق اور صوبوں کے درمیان صوبائی سرپلس پر اتفاق کیا گیا تھا، تاکہ وفاقی حکومت اپنے اخراجات پورے کرسکے۔ 2010-11 میں، یعنی 18ویں آئینی ترمیم کی منظوری اور قومی مالیاتی کمیشن (این ایف سی) ایوارڈ پر اتفاقِ رائے کے بعد پہلے ہی سال، صوبائی سرپلس کا بجٹ تخمینہ 166.9 ارب روپے مقرر کیا گیا تھا، تاہم نظرثانی شدہ تخمینوں میں اسے 119.8 ارب روپے ظاہر کیا گیا۔

رواں مالی سال کے بجٹ میں صوبائی سرپلس کا تخمینہ 1,784 ارب روپے رکھا گیا ہے، جو 16 سال قبل مقرر کردہ بجٹ تخمینے کے مقابلے میں 974 فیصد زیادہ ہے۔ یہ کہنا بے جا نہ ہوگا کہ صوبے اپنے حصے کے سرپلس پر تحفظات کا اظہار کرتے ہیں، خصوصاً وہ صوبے جہاں مرکز میں برسراقتدار جماعت سے مختلف سیاسی جماعت کی حکومت ہے۔ ان کا مؤقف ہے کہ سرپلس میں حصہ مختص کرنے کے باعث وہ اپنے عوام کے لیے سماجی شعبے کے ترقیاتی پروگرام شروع کرنے سے محروم رہتے ہیں۔

18ویں آئینی ترمیم اور این ایف سی ایوارڈ کے معماروں نے یہ بھی منصوبہ بنایا تھا کہ ایف بی آر کے ٹیکسوں کی جی ڈی پی سے شرح میں ہر سال ایک فیصد پوائنٹ اضافہ کیا جائے گا جس کے نتیجے میں بالآخر وفاقی حکومت کی اخراجات کی ضروریات پوری کرنے کے لیے وافر مالی وسائل دستیاب ہوجائیں گے۔

آج تک یہ ہدف حاصل نہیں کیا جاسکا، گزشتہ مالی سال میں ٹیکسوں کی مجموعی قومی پیداوار (جی ڈی پی) سے شرح انتہائی کم، 10.3 فیصد رہی، جبکہ 2011-12 میں یہ شرح 9.9 فیصد تھی۔ 2010 کے بعد سے پاکستان بین الاقوامی مالیاتی فنڈ (آئی ایم ایف) کے چھ پروگراموں میں شامل ہوچکا ہے جن میں اس وقت جاری پروگرام بھی شامل تھا۔

2010 کے قومی مالیاتی کمیشن (این ایف سی) ایوارڈ کے معمار کے سوا، اس کے بعد آنے والے ہر وزیرِ خزانہ، خواہ وہ ماہرِ معاشیات ہو، چارٹرڈ اکاؤنٹنٹ یا بینکر، وفاقی بجٹ کے اخراجات پورے کرنے کے لیے مالی وسائل کی کمی کا شکوہ کرتا رہا ہے اور وفاقی قابلِ تقسیم محاصل میں صوبوں کا طے شدہ حصہ کم کرنے کی تجویز دیتا رہا ہے۔ آئی ایم ایف بھی اپنے دستاویزات میں مسلسل اس مؤقف کی حمایت کرتا آیا ہے۔

یہ واضح نہیں کہ مجوزہ آئینی ترمیم، جس میں نئے صوبوں کے قیام کا تصور پیش کیا گیا ہے اور جس کے نتیجے میں نئے قومی مالیاتی کمیشن (این ایف سی) ایوارڈ کی ضرورت ہوگی کا مقصد وفاقی حکومت کا حصہ بڑھانا بھی ہے یا نہیں۔

سینیٹ کمیٹی نے وزیراعظم شہباز شریف کو 17 وزارتیں ختم کرنے کے لیے غیر حقیقت پسندانہ طور پر محض دو ہفتوں کی مہلت دی ہے۔ اتنے مختصر عرصے میں یہ کام مکمل ہونا مشکل دکھائی دیتا ہے، کیونکہ گزشتہ 16 برسوں کے دوران ان وزارتوں میں کام کرنے والے 50 ہزار سے زائد ملازمین میں سے صرف 6,700 کو صوبوں کے حوالے کیا گیا جبکہ 48 ہزار ملازمین اب بھی وفاقی حکومت کے تنخواہوں کے کھاتے میں شامل ہیں۔

حکومت پر زور دیا جانا چاہیے کہ وہ اٹھارہویں آئینی ترمیم اور 2010 کے قومی مالیاتی کمیشن (این ایف سی) ایوارڈ پر ان کی روح اور اصل منشا کے مطابق عملدرآمد یقینی بنائے۔ اس سے وفاقی حکومت اپنے بجٹ میں مختص اخراجات پورے کرنے کے قابل ہوگی جبکہ مالی خودمختاری کے ذریعے صوبے منتقل شدہ شعبوں کا انتظام سنبھالنے کی صلاحیت پیدا کرسکیں گے۔ اس کے علاوہ ممکن ہے کہ نئے صوبوں کے قیام کی ضرورت بھی پیش نہ آئے، کیونکہ اس عمل کے لیے بھی انتظامی صلاحیت پیدا کرنے میں وقت درکار ہوگا۔

کاپی رائٹ بزنس ریکارڈر 2026