اخراجات کی بنیاد پر مجموعی قومی پیداوار کا جائزہ

پاکستان بیورو آف شماریات (پی بی ایس) کی قومی آمدنی کمیٹی نے مالی سال 2025-26 کے لیے مجموعی قومی پیداوار (جی ڈی پی) کے تخمینے جاری کردیے ہیں، جن میں شعبہ وار اور اخراجات کی بنیاد پر اعدادوشمار شامل ہیں۔ بیرون ملک سے حاصل ہونے والی خالص آمدنی کو بھی مجموعی قومی آمدنی (جی این آئی) کے تخمینے میں شامل کیا گیا ہے۔

عام طور پر بیشتر تحقیقی رپورٹس اور تحریروں میں جی ڈی پی کے مختلف شعبوں کے رجحانات پر توجہ دی جاتی ہے، جبکہ اخراجات کی بنیاد پر جی ڈی پی کے مختلف اجزا کے رجحانات کو نسبتاً کم اہمیت دی جاتی ہے۔ ان اجزا میں گھریلو کھپت کے اخراجات، حکومتی اخراجات، مجموعی مستقل سرمایہ کاری، ذخائر میں تبدیلی، برآمدات اور درآمدات شامل ہیں۔ ان تمام اجزا کا مجموعہ شعبہ وار جی ڈی پی میں ٹیکسز جمع اور سبسڈیز منہا کرنے کے بعد حاصل ہونے والی مجموعی پیداوار کے برابر ہوتا ہے۔

اخراجات کی بنیاد پر جی ڈی پی کا تخمینہ لگانے کے لیے استعمال ہونے والا طریقہ کار اکاؤنٹنگ کے ایک بنیادی اصول پر مبنی ہے، جس کے تحت سب سے بڑا جزو باقی تمام براہ راست تخمینہ شدہ اجزا کو منہا کرنے کے بعد بطور بقایا حاصل کیا جاتا ہے۔ یہ جزو گھریلو کھپت کے اخراجات ہیں، جن کا تعین شعبہ وار جی ڈی پی میں سے اخراجات کے دیگر اجزا منہا کرکے کیا جاتا ہے۔

حکومتی کھپت کے اخراجات کا تخمینہ عموماً وفاقی اور صوبائی حکومتوں کے سالانہ بجٹ گوشواروں میں درج متعلقہ اخراجات کی بنیاد پر لگایا جاتا ہے۔

سرمایہ کاری سے مراد عمارتوں، مشینری اور بنیادی ڈھانچے سمیت دیگر مادی اثاثوں میں سرمایہ لگانا ہے۔ اس حوالے سے اعدادوشمار سالانہ سرویز، حکومتی بجٹ اور کمپنیوں کی رپورٹس سے جمع کیے جاتے ہیں۔

پاکستان بیورو آف شماریات کے مختلف اعدادوشمار مرتب کرنے کے طریقہ کار پر عالمی مالیاتی فنڈ (آئی ایم ایف) نے بھی سوالات اٹھائے ہیں۔ ادارے نے متعدد خامیوں اور اعدادوشمار میں تضادات کی نشاندہی کرتے ہوئے پاکستان کے سرکاری معاشی اعدادوشمار، بالخصوص قومی آمدنی کے حسابات کو جدید خطوط پر استوار کرنے پر زور دیا ہے۔

ان تحفظات کی روشنی میں پی بی ایس کی جانب سے اخراجات کی بنیاد پر جی ڈی پی کے مختلف اجزا کے حجم اور شرح نمو کا جائزہ لینے کی کوشش کی گئی ہے، جس میں دستیاب شواہد کی بنیاد پر ان اجزا کے اعدادوشمار کا تجزیہ کیا گیا ہے۔

ابتدائی طور پر اخراجات کے ان اجزا کی شرح نمو کا جائزہ لیا گیا ہے جن کا براہ راست تخمینہ لگایا جاتا ہے۔ اس تجزیے کے نتیجے میں بالآخر سب سے بڑے بقایا جزو یعنی گھریلو کھپت کے اخراجات کا تخمینہ سامنے آتا ہے۔

پاکستان بیورو آف اسٹیٹسٹکس کے مطابق مالی سال 2025-26 میں حکومتی کھپت کے حقیقی اخراجات کی شرحِ نمو نسبتاً زیادہ، یعنی 7 فیصد بتائی گئی ہے۔ اس کے برعکس 2020-21 سے 2024-25 کے دوران ان اخراجات کی رپورٹ کردہ شرحِ نمو منفی 0.6 فیصد رہی۔

تاہم وفاقی اور صوبائی حکومتوں کی بجٹ دستاویزات میں متعلقہ جاری اخراجات کا جائزہ لینے سے معلوم ہوتا ہے کہ مالی سال 2025-26 میں ان اخراجات کے مجموعی حجم میں موجودہ قیمتوں کے لحاظ سے 15.1 فیصد تک اضافہ ہوا ہے۔

اخراجات میں نمایاں اضافے دفاعی اخراجات میں 18.5 فیصد اور وفاقی سطح پر سول حکومت کے انتظامی امور چلانے کے اخراجات میں 67 فیصد سے زائد کی صورت میں دیکھنے میں آئے ہیں۔ مالی سال 2025-26 میں افراطِ زر کی شرح 7.1 فیصد کو مدنظر رکھتے ہوئے حساب لگایا جائے تو حقیقی معنوں میں ان اخراجات میں تقریباً 8 فیصد اضافہ بنتا ہے۔ درحقیقت یہ شرح پی بی ایس کے تخمینے سے بھی ایک فیصد زیادہ ہے۔

مجموعی مستقل سرمایہ کاری کے بارے میں ظاہر کیا گیا ہے کہ اس میں حقیقی معنوں میں 7.4 فیصد اضافہ ہوا ہے۔ اس شرحِ نمو کے تعین کے لیے دو اشاریوں کو استعمال کیا گیا ہے۔ پہلا اشاریہ درآمد شدہ مشینری کی مالیت میں اضافے پر مبنی ایک متبادل پیمانہ ہے، جو بڑی حد تک نجی شعبے کی سرمایہ کاری کی عکاسی کرتا ہے۔ مشینری کی درآمدات کی مالیت میں پاکستانی روپے کے لحاظ سے 6.5 فیصد اضافہ ہوا ہے لیکن افراطِ زر کی شرح کو منہا کرنے کے بعد اس اضافے کی حقیقی شرحِ نمو منفی بنتی ہے۔

حکومتی سرمایہ کاری کا اشاریہ وفاقی اور صوبائی حکومتوں کے ترقیاتی اخراجات کی سطح ہے۔ ان اخراجات میں موجودہ قیمتوں کے لحاظ سے ایک فیصد کمی ریکارڈ کی گئی ہے، جس کے نتیجے میں حقیقی معنوں میں یہ کمی 8 فیصد سے بھی زیادہ بنتی ہے۔

یہ دونوں متبادل اشاریے ظاہر کرتے ہیں کہ مجموعی مستقل سرمایہ کاری کی 7.4 فیصد شرحِ نمو مبالغہ آمیز ہے۔ حقیقتاً اس مد میں اخراجات میں شاید ہی کوئی اضافہ ہوا ہو۔

اب برآمدات کی طرف آتے ہیں۔ پی بی ایس کے مطابق برآمدات کی شرحِ نمو 7.1 فیصد رہی ہے۔ یہ اعداد و شمار اسٹیٹ بینک آف پاکستان کے توازنِ ادائیگی کے اعداد و شمار سے متعلق ہیں۔

ان اعداد و شمار کے مطابق اشیا اور خدمات کی مجموعی برآمدات میں موجودہ قیمتوں کے لحاظ سے تقریباً کوئی اضافہ نہیں ہوا۔ لہٰذا یہاں بھی اس بات کا قوی امکان ہے کہ رپورٹ کردہ شرحِ نمو حقیقت سے کہیں زیادہ ظاہر کی گئی ہے۔

پی بی ایس کے اعداد و شمار سے ظاہر ہوتا ہے کہ اشیا اور خدمات کی حقیقی درآمدات میں 7.7 فیصد تک کمی ہوئی ہے۔ تاہم توازنِ ادائیگی کے اعداد و شمار اس کے برعکس رجحان کی نشاندہی کرتے ہیں۔ ان کے مطابق درآمدات میں 7.8 فیصد اضافہ ہوا ہے، جبکہ افراطِ زر کو مدنظر رکھنے کے بعد بھی ان میں تقریباً 0.7 فیصد حقیقی اضافہ بنتا ہے۔

مندرجہ بالا حقائق ظاہر کرتے ہیں کہ مالی سال 2025-26 میں اخراجات کے طریقۂ کار کے تحت مجموعی ملکی پیداوار (جی ڈی پی ) کے مختلف اجزا کی شرحِ نمو کے سرکاری تخمینوں اور ان سے متعلقہ متبادل اشاریوں کے نتائج میں نمایاں فرق پایا جاتا ہے۔

ہاوس ہولڈ کے اعداد و شمار کے مطابق گھریلو کھپت کے اخراجات کی شرحِ نمو ایک باقی ماندہ مد کے طور پر تقریباً صفر سامنے آتی ہے۔ یہ بات یقیناً حیران کن ہے۔ مالی سال 2025-26 میں مجموعی قومی آمدنی میں حقیقی معنوں میں 3.4 فیصد اضافہ ہوا ہے، جس کا مطلب یہ ہے کہ فی کس حقیقی آمدنی میں بھی 1.3 فیصد اضافہ ہوا۔ لہٰذا یہ بات قرینِ قیاس نہیں کہ آمدنی میں اتنے نمایاں اضافے کے باوجود گھریلو کھپت کے اخراجات میں کوئی اضافہ ہی نہ ہوا ہو۔

2015-16 سے 2025-26 کے دوران صرف ایک مالی سال ایسا رہا ہے جس میں گھریلو کھپت کے اخراجات میں کمی واقع ہوئی۔ یہ مالی سال 2019-20 تھا، جب کووڈ-19 کی وبا کے باعث ان اخراجات میں کمی آئی۔ گزشتہ چار سال یعنی 2020-21 سے 2024-25 کے دوران گھریلو کھپت کے اخراجات کی اوسط شرحِ نمو 3.7 فیصد رہی، جبکہ مجموعی حقیقی قومی آمدنی کی شرحِ نمو 2.4 فیصد تھی۔ واضح طور پر جب مالی سال 2025-26 میں مجموعی قومی آمدنی کی حقیقی شرحِ نمو 3.4 فیصد رہی ہے تو اس بات کا قوی امکان ہے کہ اس سال گھریلو کھپت کے اخراجات میں بھی نمایاں اور مثبت اضافہ ہوا ہو۔

حاصلِ کلام یہ ہے کہ اخراجات کے مختلف اجزا کے براہِ راست تخمینے کسی حد تک زیادہ لگائے گئے ہیں، جس کے نتیجے میں باقی ماندہ مد یعنی گھریلو کھپت کے اخراجات میں کوئی شرحِ نمو ظاہر نہیں ہوتی۔

پی بی ایس کی جانب سے مختلف اخراجات کی شرحِ نمو کا جو خلاصہ پیش کیا گیا ہے، اس کے مطابق گھریلو کھپت کے اخراجات ایک ہی سطح پر برقرار رہے ہیں، حکومتی کھپت کے اخراجات میں بلند شرح سے اضافہ ہوا ہے، مجموعی مستقل سرمایہ کاری اور برآمدات میں نمایاں اضافہ ہوا ہے، جبکہ درآمدات میں خاصی کمی ظاہر کی گئی ہے۔

اس کے برعکس متبادل تخمینوں سے صرف ایک مد یعنی حکومتی کھپت کے اخراجات میں اسی رجحان کی تصدیق ہوتی ہے۔ دیگر اخراجاتی مدوں کے حوالے سے رجحانات مختلف نظر آتے ہیں۔ امکان ہے کہ گھریلو کھپت کے اخراجات میں کم از کم 2 فیصد کا نمایاں اضافہ ہوا ہو، جبکہ سرمایہ کاری اور برآمدات میں معمولی اضافہ ہوا ہے۔ اسی طرح درآمدات میں ظاہر کی گئی کمی بھی حقیقت میں خاصی کم ہو سکتی ہے۔

لہٰذا مجموعی ملکی پیداوار کے مختلف اجزا پر مشتمل اخراجات کی شرحِ نمو کے سرکاری تخمینوں اور متبادل تخمینوں میں نمایاں اختلاف دکھائی دیتا ہے۔ تاہم معیشت کے مختلف شعبوں کی پیداوار کی بنیاد پر مجموعی ملکی پیداوار کی شرحِ نمو کا 4 فیصد تخمینہ مناسب تصور کیا جاتا ہے۔

مندرجہ بالا اختلافات پی بی ایس کے اعداد و شمار کے معیار کے حوالے سے آئی ایم ایف کے تحفظات کی بھی تائید کرتے ہیں۔ اس بات کی ضرورت ہے کہ قومی آمدنی کے حسابات کے حوالے سے جدید ترین بین الاقوامی طریقۂ کار کا مزید گہرائی سے مطالعہ کیا جائے اور موجودہ طریقۂ کار کی خامیوں کو دور کیا جائے۔

کاپی رائٹ : بزنس ریکارڈر 2026

۔