قطری امیر اور ایرانی صدر کی ماسکو میں ملاقات، جنگ اور آبنائے ہرمز پر تبادلۂ خیال

قطر کے امیر اور ایرانی صدر نے ماسکو میں ملاقات کے دوران مشرقِ وسطیٰ میں جاری جنگ اور ناکہ بندی کے باعث بند آبنائے ہرمز کی صورتحال پر تبادلۂ خیال کیا ہے۔ قطری امیر کے دفتر نے منگل کے روز اس کی تصدیق کی۔

یہ اعلیٰ سطحی ملاقات پاکستان، سعودی عرب اور ترکیہ کے اعلیٰ حکام کی تہران میں ایران کے ساتھ بات چیت کے ایک روز بعد ہوئی ہے۔ ان مذاکرات کا مقصد مشرقِ وسطیٰ میں جنگ کو دوبارہ بھڑکنے سے روکنے کی کوشش کرنا تھا۔

قطر کے امیر شیخ تمیم بن حمد آل ثانی اور ایرانی صدر مسعود پزشکیان نے منگل کے روز ماسکو میں گیس برآمد کرنے والے ممالک کے فورم کے سربراہی اجلاس کے موقع پر ملاقات کی۔

ایرانی صدر مسعود پزشکیان کی اسی روز بعد میں روسی صدر ولادیمیر پیوٹن سے بھی ملاقات متوقع ہے۔

ایرانی سرکاری ٹیلی ویژن کے مطابق، قطر اور ایران کے رہنماؤں نے ’’تہران اور دوحہ کے درمیان تعلقات کی موجودہ صورتحال کا جائزہ لیا اور سیاسی و اقتصادی روابط مزید گہرے بنانے اور دوطرفہ تعاون مضبوط کرنے کے لیے موجودہ صلاحیتوں سے فائدہ اٹھانے کی اہمیت پر زور دیا۔‘‘

پاکستان اور قطر، امریکا اور ایران کے درمیان دیرپا معاہدے کے لیے کوششوں میں پیش پیش رہے ہیں۔

ایرانی وزارتِ خارجہ کے ترجمان اسماعیل بقائی نے اس سے قبل بتایا تھا کہ اتوار کے روز قطری وفد نے تہران کا دورہ کیا، جہاں ’’خطے کی صورتحال میں پیش رفت، بالخصوص مذاکرات کی تازہ ترین صورتحال، آبنائے ہرمز اور توانائی کی فراہمی‘‘ کا جائزہ لیا گیا۔

قطری وزارتِ خارجہ کے عہدیدار ابراہیم الہاشمی نے منگل کے روز کہا کہ خطے میں مزید تشدد روکنے کے لیے نئے سکیورٹی فریم ورک کی ضرورت ہے۔

انہوں نے کہا، ’’اب گیند ایران کے کورٹ میں ہے کہ وہ ان اصولوں کی پاسداری کرے اور اپنی نیک نیتی ثابت کرے۔‘‘

ان کا مزید کہنا تھا، ’’ہم نے ایرانی قیادت کی جانب سے مثبت بیانات سنے ہیں، لیکن اسے اب بھی اپنی نیک نیتی ثابت کرنا، خطے کے ممالک کو دھمکیاں دینا بند کرنا اور آبنائے ہرمز دوبارہ کھولنا ہوگا، تاکہ ان تمام کوششوں کو ایک محفوظ اور خوشحال خطے کے قیام کے لیے بروئے کار لایا جا سکے۔‘‘

پیر کے روز تہران میں ہونے والے مذاکرات میں سعودی وزیرِ دفاع خالد بن سلمان، پاکستان کے آرمی چیف جنرل عاصم منیر اور ترکیہ کے انٹیلی جنس چیف ابراہیم قالن نے شرکت کی۔ ایران نے ان مذاکرات کو ’’بہت اچھا‘‘ قرار دیا۔

یہ مذاکرات امریکا، ایران اور اسرائیل کی جانب سے آٹھ ماہ سے جاری جنگ میں دوبارہ لڑائی شروع ہونے کے خدشات کے اظہار کے بعد ہوئے۔ اس جنگ کے دوران تہران نے خطے میں قطر سمیت امریکا کے اتحادی ممالک کو بھی نشانہ بنایا ہے۔

اکتوبر کے اوائل میں روسی صدر ولادیمیر پیوٹن نے کہا تھا کہ روس جنگ ختم کرانے کے لیے ثالثی کی کوششوں میں حصہ لینے کو تیار ہے۔