حکومت کی قطری سرمایہ کاروں کو خصوصی اقتصادی زونز میں سرمایہ کاری کی دعوت

پاکستان نے قطری سرمایہ کاروں کو اپنے خصوصی اقتصادی زونز (SEZs) میں سرمایہ کاری کی دعوت دی ہے۔ ورلڈ انویسٹمنٹ فورم 2026 کے موقع پر دوحہ میں ہونے والی ملاقاتوں کے دوران وفاقی وزیرِ تجارت جام کمال خان نے قطر کے ساتھ تجارت کے فروغ، غذائی تحفظ اور سرمایہ کاری بڑھانے پر تبادلۂ خیال کیا۔

منگل کو جاری ہونے والے ایک بیان کے مطابق وفاقی وزیرِ تجارت جام کمال خان نے اعلیٰ حکام، عالمی اقتصادی قیادت اور ممتاز کاروباری شخصیات کے ساتھ اعلیٰ سطح ملاقاتوں کا ایک سلسلہ منعقد کیا۔ ان ملاقاتوں میں پاکستان کے بین الاقوامی تجارتی تعلقات کو مضبوط بنانے، غیر ملکی سرمایہ کاری کو راغب کرنے، علاقائی روابط کو بہتر بنانے اور اہم شعبوں میں اقتصادی تعاون کو وسعت دینے پر توجہ مرکوز کی گئی۔

25 اور 26 اکتوبر کو ہونے والی ملاقاتوں کے دوران وفاقی وزیرِ تجارت نے ڈی-8 تنظیم برائے اقتصادی تعاون کے سیکریٹری جنرل، قطر کے وزیرِ بلدیات، قطر چیمبر آف کامرس اینڈ انڈسٹریز کے چیئرمین اور ریتاج گروپ کے نمائندوں سے ملاقاتیں کیں۔

ایک اہم ملاقات میں جام کمال خان نے قطر چیمبر آف کامرس اینڈ انڈسٹریز کے چیئرمین سے ملاقات کی جس میں دوطرفہ تجارت، سرمایہ کاری اور نجی شعبے کے درمیان تعاون کو مضبوط بنانے کے لیے نئے مواقع تلاش کرنے پر تبادلۂ خیال کیا گیا۔

وفاقی وزیرِ تجارت نے قطری کاروباری برادری پر زور دیا کہ وہ پاکستانی ہم منصبوں کے ساتھ کاروباری روابط کو فروغ دے اور عوامی سطح پر تعلقات کو مزید مضبوط بنائے تاکہ پاکستان اور قطر کے درمیان دیرینہ دوستی کو ٹھوس اقتصادی اور تجارتی مواقع میں تبدیل کیا جاسکے۔

پاکستان میں سرمایہ کاری کے امکانات کو اجاگر کرتے ہوئے جام کمال خان نے قطری سرمایہ کاروں کو ملک کے خصوصی اقتصادی زونز، خصوصاً کراچی کے صنعتی علاقے میں سرمایہ کاری کے مواقع تلاش کرنے کی دعوت دی۔ انہوں نے کہا کہ برآمدات پر مبنی مینوفیکچرنگ اور صنعتی شراکت داری کے ذریعے مقامی اور بین الاقوامی منڈیوں تک رسائی حاصل کی جاسکتی ہے۔

انہوں نے پاکستان کے تزویراتی جغرافیائی محلِ وقوع کو بھی نمایاں کیا اور کہا کہ تجارتی روابط اور سپلائی چین کے نیٹ ورکس کو بہتر بنا کر سرمایہ کار افریقہ سمیت وسیع تر علاقائی منڈیوں تک رسائی حاصل کرسکتے ہیں۔

مذاکرات کے دوران قطر چیمبر کے چیئرمین نے عالمی سپلائی چین کے بدلتے رجحانات کو اجاگر کیا اور مجوزہ علاقائی ٹرانزٹ روٹس اور رابطہ کاری کے اقدامات میں دلچسپی کا اظہار کیا۔

دونوں فریقوں نے اس بات پر اتفاق کیا کہ لاجسٹکس کے بنیادی ڈھانچے میں بہتری، سپلائی چین کے ذرائع میں تنوع اور علاقائی نقل و حمل کے مضبوط روابط تجارت کے فروغ، کاروباری رکاوٹوں میں کمی اور پاکستان و قطر کے کاروبار کے لیے نئی منڈیوں تک رسائی میں اہم کردار ادا کر سکتے ہیں۔

ملاقات میں تجارتی و اقتصادی تعلقات کو مضبوط بنانے اور قابلِ عمل تجارتی منصوبوں کی نشاندہی کے لیے ایوان ہائے تجارت، سرمایہ کاروں اور کاروباری برادریوں کے درمیان مسلسل رابطوں کی اہمیت پر زور دیا گیا۔

دونوں فریقوں نے سرمایہ کاری کے فروغ، نجی شعبے کے درمیان شراکت داری کو وسعت دینے اور مشترکہ اقتصادی خوشحالی کے لیے اپنے عزم کا اعادہ کیا۔

قطر کے نجی شعبے کے ساتھ روابط کے سلسلے میں وفاقی وزیرِ تجارت جام کمال خان نے ریتاج گروپ کے نمائندوں سے بھی ملاقات کی جس میں مہمان نوازی اور سیاحت کی صنعتوں میں ممکنہ تعاون پر تبادلۂ خیال کیا گیا۔

ملاقات کے دوران ریتاج گروپ نے پاکستانی کاروباری شراکت داروں کے ساتھ مشترکہ منصوبے شروع کرنے اور پاکستان سمیت دیگر برادر اسلامی ممالک میں اپنے ہوٹلنگ اور مہمان نوازی کے برانڈز کو وسعت دینے کے امکانات کا جائزہ لینے میں دلچسپی ظاہر کی۔

مذاکرات میں ممکنہ سرمایہ کاری شراکت داری، شعبۂ مہمان نوازی کی ترقی اور دونوں ممالک کے کاروباری اداروں کے درمیان زیادہ تعاون کے مواقع پر توجہ مرکوز کی گئی۔

دونوں فریقوں نے اس بات کو تسلیم کیا کہ مہمان نوازی اور سیاحت کے شعبوں میں تعاون نجی سرمایہ کاری کے فروغ، نئے تجارتی مواقع پیدا کرنے اور پاکستان و قطر کے درمیان اقتصادی تعلقات مضبوط بنانے میں اہم کردار ادا کر سکتا ہے۔

25 اکتوبر کو ڈی-8 تنظیم برائے اقتصادی تعاون کے سیکریٹری جنرل سے ملاقات میں وفاقی وزیرِ تجارت جام کمال خان نے رکن ممالک کے درمیان اقتصادی انضمام کو مضبوط بنانے اور تجارت کے فروغ کے لیے اقدامات پر تبادلۂ خیال کیا۔

ڈی-8 کے سیکریٹری جنرل نے تنظیم کے لیے پاکستان کی مسلسل حمایت کو سراہا اور مصر کی جانب سے ڈی-8 ترجیحی تجارتی معاہدے کی توثیق کے بعد اس پر عمل درآمد کی اہمیت کو اجاگر کیا۔

دونوں فریقوں نے اس بات پر زور دیا کہ نجی شعبے کی زیادہ شمولیت، منڈیوں تک بہتر رسائی اور رکن ممالک کے درمیان مضبوط تجارتی روابط کے ذریعے موجودہ اقتصادی تعاون کے فریم ورک کو عملی تجارتی مواقع میں تبدیل کیا جائے۔

جام کمال خان نے ڈی 8 کے دائرۂ کار میں تعاون کو مضبوط بنانے اور رکن ممالک کے درمیان تجارت کو آسان بنانے، سرمایہ کاری کی حوصلہ افزائی اور پائیدار اقتصادی ترقی کے فروغ کیلئے پاکستان کے عزم کا اعادہ کیا۔

26 اکتوبر کو ایک علیحدہ دوطرفہ ملاقات میں وفاقی وزیرِ تجارت نے قطر کے وزیرِ بلدیات سے ملاقات کی جس میں زراعت، غذائی تحفظ اور دوطرفہ تجارت کے شعبوں میں تعاون کو وسعت دینے پر تبادلۂ خیال کیا گیا۔

دونوں فریقوں نے تجارتی تعلقات مضبوط بنانے اور زرعی ترقی و غذائی سپلائی چین کے شعبوں میں ادارہ جاتی اور کاروباری سطح پر روابط بڑھانے کے مواقع پر تبادلۂ خیال کیا۔

مذاکرات میں متعلقہ سرکاری اداروں اور نجی شعبے کے شراکت داروں کے درمیان قریبی تعاون کے امکانات کو اجاگر کیا گیا تاکہ عملی تعاون کے شعبوں کی نشاندہی اور دونوں ممالک کے لیے مفید تجارتی شراکت داریوں کو فروغ دیا جا سکے۔