سعودی عرب میں ہیلی کاپٹر گر کر تباہ، عملے کے 2 ارکان ہلاک

سعودی عرب کے علاقے نجران میں تکنیکی خرابی کے باعث جاسوسی ہیلی کاپٹر اے ایچ 6 آئی گر کر تباہ ہو گیا، جس کے نتیجے میں اس کے عملے کے دونوں ارکان ہلاک ہو گئے۔ سعودی قیادت میں قائم اتحادی افواج کے ترجمان میجر جنرل ترکی المالکی نے اتوار کو ایک بیان میں یہ بات بتائی۔

بیان میں مزید کہا گیا کہ ہیلی کاپٹر ایسے علاقے میں گرا جو سعودی وزارتِ نیشنل گارڈ کے دائرہ اختیار میں آتا ہے۔

جنوب مغربی علاقے نجران کو حالیہ ہفتوں میں ایران کے حمایت یافتہ حوثیوں کے حملوں کا سامنا رہا ہے۔ اتحادی افواج اور یمن میں سرگرم اس مسلح گروپ کے درمیان لڑائی میں شدت آنے کے بعد یمن کا تنازع ایران کے خلاف امریکا کی قیادت میں جاری جنگ کا ایک اور محاذ بن گیا ہے۔

حوثی فوجی ترجمان یحییٰ سریع نے ہفتے کو سوشل میڈیا پلیٹ فارم ایکس پر ایک پوسٹ میں دعویٰ کیا تھا کہ گروپ نے نجران کے قریب سعودی اپاچی ہیلی کاپٹر کو مار گرایا ہے۔ ان کے مطابق ہیلی کاپٹر سرحد کے ساتھ حوثیوں کے ٹھکانوں کو نشانہ بنانے کی مبینہ دشمنانہ کارروائیوں میں مصروف تھا۔

ترکی المالکی نے اتوار کو سریع کی پوسٹ پر تبصرہ کرتے ہوئے قطار میں کھڑے کئی اپاچی ہیلی کاپٹروں کی تصویر شیئر کی اور لکھا، آپ دعویٰ کرتے ہیں کہ آپ نے اسے مار گرایا ہے، لیکن یہ جلد ہی میدانِ جنگ میں داخل ہوگا۔