امریکی فوج ایران کے خلاف مدر آف آل بمز استعمال کرسکتی ہے، سی این این

امریکی نشریاتی ادارے سی این این نے جمعرات کو معاملے سے آگاہ امریکی حکام کے حوالے سے رپورٹ کیا کہ امریکی فوج نے ایران پر ممکنہ حملوں کے منصوبے تیار کیے ہیں جن میں جی بی یو-43/بی میسیو آرڈیننس ایئر بلاسٹ بم استعمال کیا جا سکتا ہے جسے مدر آف آل بمز بھی کہا جاتا ہے۔

رپورٹ کے مطابق اگر صدر ڈونلڈ ٹرمپ دوبارہ فوجی کارروائیاں شروع کرنے کا حکم دیتے ہیں تو ان منصوبوں کے تحت ایران کے توانائی کے بنیادی ڈھانچے اور جوہری تنصیبات کو نشانہ بنایا جا سکتا ہے۔

امریکی اسلحہ خانے میں موجود سب سے بڑے غیر جوہری بم کے ممکنہ استعمال کو تنازع میں ایک بڑی شدت کے اضافے کے طور پر دیکھا جا رہا ہے۔ تاہم فوجی منصوبہ بندی سے واقف حکام نے سی این این کو بتایا کہ واشنگٹن کے تزویراتی مقاصد کے حصول میں اس بم کی افادیت تاحال سوالیہ نشان ہے۔

خبر رساں ادارہ رائٹرز فوری طور پر اس رپورٹ کی تصدیق نہیں کر سکا۔