بھارت میں کاکروچ تحریک کے رہنما گرفتار، چیف الیکشن کمشنر سے استعفے کا مطالبہ

بھارت میں کاکروچ نوجوان تحریک کے اہم رہنماؤں کو منگل کے روز اس وقت حراست میں لے لیا گیا جب انہوں نے رکاوٹیں عبور کرکے تاریخی جنتر منتر کے احاطے میں داخل ہونے کی کوشش کی۔ مظاہرین چیف الیکشن کمشنر گیانیش کمار سے متنازع انتخابی فہرستوں میں تبدیلیوں پر استعفے کا مطالبہ کر رہے تھے۔

کاکروچ جنتا پارٹی اور اپوزیشن جماعتیں رواں ماہ تقریباً روزانہ احتجاج کر رہی ہیں۔ ناقدین کا الزام ہے کہ ووٹر فہرستوں میں تبدیلیوں سے وزیراعظم نریندر مودی کی بھارتیہ جنتا پارٹی (بی جے پی) کو فائدہ پہنچانے کی کوشش کی گئی ہے۔

الیکشن کمیشن نے کسی سیاسی جماعت کی حمایت کرنے کی تردید کرتے ہوئے کہا ہے کہ غلطی سے فہرستوں سے خارج کیے گئے ووٹر دوبارہ اندراج کرا سکتے ہیں۔ دوسری جانب بی جے پی نے اپوزیشن پر جائز انتخابی عمل کو بلاجواز مشکوک بنا کر جمہوریت کو نقصان پہنچانے کا الزام عائد کیا ہے۔

کاکروچ جنتا پارٹی کے مطابق اس کے رہنما آشوتوش رانکا، سورَو داس اور اجنکیا شندے سمیت تقریباً 20 کارکنوں کو جنتر منتر میں داخل ہو کر احتجاجی مقام دوبارہ حاصل کرنے کی کوشش کے دوران گرفتار کیا گیا۔ پارٹی کے بانی ابھیجیت دپکے نے کہا کہ مزاحمت کو سرکاری طور پر احتجاجی مقام کی حیثیت ختم کرکے نہیں روکا جا سکتا۔

دہلی پولیس نے جنتر منتر کو باضابطہ احتجاجی مقام کی فہرست سے خارج کرتے ہوئے تین نئے مقامات مقرر کیے ہیں۔

گزشتہ 12 برسوں میں مودی حکومت کے لیے نوجوان تحریک ایک بڑا سیاسی چیلنج بن کر ابھری ہے۔ مظاہرین کا کہنا ہے کہ ووٹر فہرستوں سے 13 کروڑ سے زائد نام خارج کیے گئے، جن میں اقلیتوں کے ووٹر بھی شامل ہیں۔ اپوزیشن کا الزام ہے کہ اس اقدام سے مسلمان اور دیگر اقلیتیں غیر متناسب طور پر متاثر ہوئی ہیں، تاہم الیکشن کمیشن اور بی جے پی ان الزامات کو مسترد کرتے ہیں۔