پاکستان اور پرتگال کا ٹیکسٹائل، زراعت، خصوصی اقتصادی زونز میں سرمایہ کاری پر تبادلہ خیال

اسپیشل انویسٹمنٹ فیسیلیٹیشن کونسل (ایس آئی ایف سی) اور پرتگال کے سفیر پاؤلو ڈومنگیوس نے پاکستان اور پرتگال کے درمیان اقتصادی، تجارتی اور سرمایہ کاری کے تعاون کو مضبوط بنانے کے طریقوں پر تبادلہ خیال کیا۔

ایس آئی ایف سی نے ہفتے کو جاری ایک بیان میں کہا کہ ملاقات میں باہمی دلچسپی کے شعبوں کا جائزہ لینے اور دونوں ممالک کی کاروباری برادریوں کے درمیان مزید تعاون کے لیے سازگار مواقع کی نشاندہی کا موقع ملا۔

مذاکرات میں ٹیکسٹائل، زراعت، انفارمیشن اینڈ کمیونیکیشن ٹیکنالوجی، فارماسیوٹیکلز اور اسپیشل اکنامک زونز (ایس ای زیڈز) میں سرمایہ کاری کے مواقع کا جائزہ لیا گیا جس سے تجارتی روابط اور سرمایہ کاری شراکت داری بڑھانے کے امکانات اجاگر ہوئے۔

بیان کے مطابق خصوصی سرمایہ کاری سہولت کونسل نے سفیر کو ترجیحی شعبوں میں پاکستان کی سرمایہ کاری کی استعداد اور سرمایہ کاروں پر مرکوز سہولت کاری کے نظام سے آگاہ کیا جس کا مقصد ملکی اور بین الاقوامی سرمایہ کاروں کو مربوط معاونت فراہم کرنا ہے۔

ملاقات میں بین الاقوامی کاروباری اداروں اور ادارہ جاتی شراکت داروں کے ساتھ پاکستان کے بڑھتے ہوئے روابط سے پیدا ہونے والے مواقع پر بھی روشنی ڈالی گئی۔

اس تناظر میں ایس آئی ایف سی نے سیالکوٹ میں فارورڈ اسپورٹس کے اشتراک سے ایف سی پورٹو کی ڈریگن فورس اکیڈمی کے آغاز کو بھی سراہا۔ اس اقدام کے تحت معروف پرتگالی فٹبال کلب کا نوجوانوں کی تربیت کا پروگرام پاکستان لایا گیا ہے جو دونوں ممالک کے درمیان ادارہ جاتی اور تجارتی روابط مضبوط بنانے کا ایک اور ذریعہ فراہم کرتا ہے۔

کونسل نے اپنے بیان میں کہا کہ ایس آئی ایف سی نے بین الاقوامی شراکت داروں کے ساتھ مسلسل روابط کی اہمیت پر زور دیا تاکہ تجارتی طور پر قابل عمل منصوبوں کی نشاندہی کی جاسکے اور پاکستانی و پرتگالی سرمایہ کاروں اور کاروباری اداروں کے درمیان مزید مضبوط روابط قائم کیے جاسکیں۔