بلوچستان میں دو روزہ کارروائیوں کے دوران 16 دہشت گرد ہلاک، آئی ایس پی آر
- آئی ایس پی آر کے مطابق 21 ستمبر سے اب تک صوبے میں مجموعی طور پر 33 دہشت گرد ہلاک کیے جا چکے ہیں
فوج کے شعبہ تعلقات عامہ (آئی ایس پی آر) نے جمعہ کو بتایا ہے کہ سکیورٹی فورسز نے گزشتہ 48 گھنٹوں کے دوران بلوچستان میں انسداد دہشت گردی کی الگ الگ کارروائیوں میں 16 دہشت گردوں کو ہلاک کردیا۔
آئی ایس پی آر کے مطابق 24 ستمبر کو کوئٹہ کے ضلع کے علاقے شعبان میں کارروائی کے دوران 5 دہشت گرد ہلاک کیے گئے، جہاں آپریشن شعبان کے تسلسل میں سکیورٹی فورسز نے مزید ٹھکانے بھی تباہ کیے۔ کارروائی کے دوران اسلحہ، گولہ بارود اور دھماکا خیز مواد بھی برآمد ہوا۔
دوسری کارروائی 25 ستمبر کو ضلع نوشکی میں خفیہ اطلاع کی بنیاد پر کی گئی، جہاں سکیورٹی فورسز نے دہشت گردوں کے ایک ٹھکانے کو نشانہ بنایا۔ شدید فائرنگ کے تبادلے کے بعد 11 دہشت گرد ہلاک کردیے گئے۔
آئی ایس پی آر نے کہا کہ ان کارروائیوں میں نام نہاد بھارتی سرپرستی میں سرگرم ’فتنۃ الخوارج‘ اور ’فتنۃ الہندوستان‘ کو نشانہ بنایا گیا۔
فوج نے کہا کہ ملک سے غیر ملکی سرپرستی میں ہونے والی دہشت گردی کے خاتمے کے لیے ’’عزمِ استحکام‘‘ کے تحت انسداد دہشت گردی کی مہم پوری رفتار سے جاری رہے گی۔
آئی ایس پی آر نے مزید بتایا کہ حالیہ ہلاکتوں کے بعد 21 ستمبر سے بلوچستان میں ہونے والی کارروائیوں کے دوران ہلاک کیے گئے دہشت گردوں کی مجموعی تعداد 33 ہوگئی ہے۔
Comments