ہونان ریسورسز کی دھابیجی فیکٹری 7 ماہ بعد دوبارہ فعال

ہونان ریسورسز ایس ایم سی (پرائیویٹ) لمیٹڈ نے سندھ کے علاقے دھابیجی میں واقع اپنی صنعتی تنصیب میں دوبارہ کام شروع کردیا ہے۔ کمپنی نے ایک خط میں بتایا کہ خصوصی سرمایہ کاری سہولت کونسل (ایس آئی ایف سی) کی مداخلت کے بعد فیکٹری جو فروری سے بند تھی دوبارہ فعال ہوگئی ہے۔

15 ستمبر کو لکھے گئے ایک خط میں جو خصوصی سرمایہ کاری سہولت کونسل کے نام تھا کمپنی نے بتایا کہ ان کی فیکٹری فروری 2026 سے بند تھی۔

کمپنی کے مطابق ہماری فیکٹری فروری 2026 سے بند تھی جس کے نتیجے میں کمپنی کو بھاری مالی نقصانات کا سامنا کرنا پڑا اور ہماری سرمایہ کاری، آپریشنز اور کاروباری ذمہ داریاں بھی نمایاں طور پر متاثر ہوئیں۔ ہماری مسلسل کوششوں کے باوجود یہ معاملہ ایک طویل عرصے تک حل طلب رہا۔

کمپنی نے مسئلے کی نوعیت ظاہر نہیں کی۔

ہونان ریسورسز نے اپنی صنعتی تنصیب سے متعلق معاملے کو حل کرنے میں ایس آئی ایف سی کی مداخلت اور تعاون پر اظہارِ تشکر کیا۔

کمپنی نے کہا کہ ہم سرمایہ کاروں کو سہولت فراہم کرنے اور حقیقی کاروباری و عملی مشکلات کے حل میں ایس آئی ایف سی کے کردار کو قدر کی نگاہ سے دیکھتے ہیں۔ ہمیں فراہم کی جانے والی معاونت نے ہماری سرمایہ کاری کے تحفظ میں مدد دی ہے اور پاکستان میں اپنی کاروباری اور سرمایہ کاری کی سرگرمیاں جاری رکھنے کے حوالے سے ہمارے اعتماد کو مزید مضبوط کیا ہے۔

ایس آئی ایف سی نے کہا کہ صنعتی تنصیب کا دوبارہ کھلنا سرمایہ کاروں کے تحفظات دور کرنے اور صنعتی سرگرمیوں کے تسلسل کو یقینی بنانے میں مربوط سرمایہ کاری سہولت کاری کے مثبت اثرات کی عکاسی کرتا ہے۔

ایس آئی ایف سی حکومت کے تمام اداروں کو شامل کرتے ہوئے اختیار کیے گئے جامع حکومتی طریقۂ کار کے تحت سرمایہ کاروں کو مسلسل سہولت فراہم کررہا ہے جس میں جائز کاروباری تحفظات کو دور کرنے، سرمایہ کاروں کے اعتماد کو مضبوط بنانے اور سرمایہ کاری و صنعتی سرگرمیوں کے لیے مزید سازگار ماحول پیدا کرنے پر توجہ دی جارہی ہے۔

ایس آئی ایف سی پاکستان میں سرمایہ کاری کو سہولت فراہم کرنے، سرمایہ کاروں کے مفادات کے تحفظ اور پائیدار صنعتی ترقی کے فروغ کے لیے بدستور پُرعزم ہے۔