فیڈ کے شرح سود فیصلے سے قبل سونے کی قیمتوں میں معمولی کمی

سونے کی قیمتوں میں بدھ کو محدود اتار چڑھاؤ رہا کیونکہ مارکیٹ شرکا امریکی فیڈرل ریزرو کے پالیسی فیصلے سے قبل محتاط رویہ اختیار کیے ہوئے ہیں جس میں شرح سود میں اضافے کی وسیع پیمانے پر توقع کی جارہی ہے۔

اسپاٹ گولڈ کی قیمت 0.1 فیصد کمی سے 4,288.48 ڈالر فی اونس رہی جبکہ پیر کو قیمت ایک ماہ سے زائد عرصے کی کم ترین سطح پر آگئی تھی۔

دسمبر کی ڈلیوری کے لیے امریکی گولڈ فیوچرز بھی 0.1 فیصد کمی سے 4,328.10 ڈالر فی اونس پر آگئے۔

سی ایم ای فیڈ واچ کے مطابق اب ٹریڈرز اس بات کا 92.4 فیصد امکان ظاہر کر رہے ہیں کہ آج کے روز امریکی شرحِ سود میں کم از کم 25 بیسس پوائنٹس کا اضافہ کیا جائے گا۔ پالیسی کے اس فیصلے کے بعد فیڈرل ریزرو کے چیئرمین کیون واش کی ایک پریس کانفرنس بھی متوقع ہے۔

فرینک وال بام نے کہا کہ اگر فیڈرل ریزرو نے سخت گیر مؤقف اپنایا تو سونے کی قیمتوں میں مزید کمی آسکتی ہے جبکہ نرم پالیسی اشارے شرح سود میں اضافے کی توقعات کو کم کرسکتے ہیں اور سونے کی قیمتوں کو بحالی میں مدد دے سکتے ہیں۔ تاجروں کی نظریں تیل کی قیمتوں اور مشرق وسطیٰ کی صورتحال پر بھی مرکوز ہیں۔

سونا عام طور پر مہنگائی کے خلاف ایک دفاعی حصار سمجھا جاتا ہے لیکن شرح سود میں اضافہ ایسی غیر منافع بخش قیمتی دھات کو پاس رکھنے کی متبادل لاگت کو بڑھا دیتا ہے۔

ڈالر نے حالیہ حاصل شدہ برتری برقرار رکھی جبکہ تیل کی قیمتیں 100 ڈالر فی بیرل سے اوپر رہیں۔

مضبوط ڈالر دوسری کرنسیوں کے حامل افراد کے لیے گرین بیک (ڈالر) میں قیمت والے سونے کو مزید مہنگا بنا دیتا ہے جبکہ تیل کی بلند قیمتیں مہنگائی کے دباؤ میں مزید اضافہ کرتی ہیں۔

جغرافیائی سیاسی محاذ پر سعودی عرب نے اپنے مختلف علاقوں جن میں مقدس شہر مکہ مکرمہ اور ملک کا دوسرا بڑا شہر جدہ بھی شامل ہیں کے لیے سکیورٹی الرٹس جاری کیے ہیں۔ یہ اقدام ایران نواز جنگجوؤں کی جانب سے ایک ہفتے سے جاری حملوں کے بعد کیا گیا جن کے باعث سعودی عرب مشرق وسطیٰ کی جنگ میں مزید گہرائی تک شامل ہوگیا ہے۔

کومرز بینک نے کہا کہ یہ قدرے حیران کن ہے کہ اب تک سونے کی قیمتوں پر زیادہ دباؤ نہیں آیا۔ بینک کے مطابق سونے کی قیمتوں میں لچک کی وجہ مسلسل مالی خدشات ہوسکتے ہیں جن کی عکاسی طویل مدتی حکومتی بانڈز کی بلند ییلڈز سے ہوتی ہے جبکہ امریکا میں حالیہ سیاسی خطرات میں اضافہ بھی سونے کی قیمتوں کو سہارا دے رہا ہے۔

دیگر دھاتوں میں اسپاٹ چاندی کی قیمت 63.67 ڈالر فی اونس پر مستحکم رہی، پلاٹینم 0.3 فیصد کمی سے 1,770.47 ڈالر فی اونس پر آگیا جبکہ پیلیڈیم کی قیمت تقریباً 1 فیصد اضافے سے 1,301.61 ڈالر فی اونس ہوگئی۔