میامی ایئرپورٹ پر ایمیزون کارگو طیارہ حادثے کا شکار، 5 افراد ہلاک

امریکی ریاست فلوریڈا کے میامی انٹرنیشنل ایئرپورٹ پر ایمیزون پرائم ایئر کا کارگو طیارہ لینڈنگ کے دوران رن وے سے باہر نکل کرکے متعدد گاڑیوں سے ٹکرا گیا، حادثے میں کم از کم 5 افراد ہلاک اور 5 زخمی ہوگئے۔

مقامی حکام کے مطابق پرائم ایئر کی پرواز 7598 اتوار کو دوپہر تقریباً 2 بجے میامی ایئرپورٹ کے رن وے سے باہر نکل گئی اور زمین پر موجود متعدد گاڑیوں کو ٹکر مار دی۔

میامی ڈیڈ فائر چیف رے جاداللہ نے بتایا کہ زخمیوں میں 3 کی حالت تشویشناک ہے۔ کم از کم 2 افراد طیارے کی زد میں آنے والی گاڑیوں میں پھنس گئے تھے، جبکہ پائلٹ اور معاون پائلٹ بھی طیارے کے اندر پھنس گئے تھے۔ حکام نے ہلاک ہونے والوں کی شناخت ظاہر نہیں کی۔

میامی ڈیڈ فائر ریسکیو کے مطابق امدادی کارروائیوں میں 60 سے زائد ریسکیو یونٹس اور تقریباً 200 اہلکاروں نے حصہ لیا۔ حادثے کے بعد طیارے سے ایندھن کا اخراج جاری رہا۔

حادثے کے فوری بعد ایئرپورٹ کی تمام پروازیں روک دی گئی تھیں، تاہم اتوار کی شام تک 4 میں سے 2 رن وے دوبارہ کھول دیے گئے۔

حادثے کا شکار 32 سال پرانا بوئنگ 767-300 کارگو طیارہ تھا، جو پورٹو ریکو کے شہر سان خوان سے روانہ ہوا تھا۔ کارگو ایئرلائن 21 ایئر یہ طیارہ ایمیزون کے لیے چلا رہی تھی۔

امریکی نیشنل ٹرانسپورٹیشن سیفٹی بورڈ نے حادثے کی تحقیقات شروع کردی ہیں۔ ادارے کی سربراہ جینیفر ہومینڈی کی قیادت میں ٹیم پیر کو میامی میں ابتدائی بریفنگ دے گی۔