جاپانی ین مضبوط، ڈالر پر دباؤ بڑھ گیا

جاپانی ین نے جمعرات کو گزشتہ سیشن میں اچانک اور مختصر تیزی کے بعد اپنی برتری برقرار رکھی، جس سے امریکی ڈالر پر دباؤ بڑھ گیا۔ مارکیٹ کے شرکا کو شبہ ہے کہ ین کی اس تیزی میں جاپانی حکام کا ممکنہ کردار ہوسکتا ہے، جبکہ سرمایہ کار اہم امریکی روزگار رپورٹ کے منتظر ہیں۔

ین کی قدر ڈالر کے مقابلے میں 158.88 پر مستحکم رہی۔ گزشتہ روز ین میں 0.9 فیصد اضافہ ہوا تھا، جس کے بعد مارکیٹ میں یہ قیاس آرائیاں شروع ہوگئیں کہ ٹوکیو کے حکام نے کرنسی مارکیٹ میں مداخلت کی تیاری کے طور پر ریٹ چیک کیا ہے۔

کامن ویلتھ بینک آف آسٹریلیا کی کرنسی اسٹریٹجسٹ کیرول کانگ نے کہا کہ ین کی تقریباً 0.9 فیصد تیزی کوئی بہت بڑا اضافہ نہیں، اس لیے وہ اسے براہ راست حکومتی مداخلت نہیں سمجھتیں، تاہم بعض مارکیٹ شرکا کا خیال ہے کہ یہ ریٹ چیک کے باعث ہوئی۔

31 جولائی کو امریکہ اور جاپان کی جانب سے ین کی قدر بڑھانے کے لیے مشترکہ مداخلت کے بعد بھی جاپانی کرنسی کو مستقل حمایت حاصل نہیں ہوسکی۔ بلند شرح سود کے فرق، مالیاتی خدشات اور توانائی کی قیمتوں میں دوبارہ اضافے نے ین پر دباؤ برقرار رکھا ہے۔

وسیع تر مارکیٹ میں ڈالر کمزور رہا۔ یورو معمولی اضافے کے ساتھ 1.1589 ڈالر جبکہ برطانوی پاؤنڈ 1.3482 ڈالر پر آگیا۔ ڈالر انڈیکس 0.04 فیصد کمی سے 99.56 پر رہا۔

اب سرمایہ کاروں کی نظریں جمعہ کو جاری ہونے والی امریکی نان فارم پے رولز رپورٹ پر ہیں۔ تجزیہ کاروں نے اگست میں 56,000 نئی ملازمتوں کا تخمینہ لگایا ہے، جبکہ جولائی میں ملازمتوں میں حیران کن طور پر 23,000 کمی ہوئی تھی۔ بے روزگاری کی شرح 4.1 فیصد رہنے کی توقع ہے۔

مارکیٹ میں ستمبر میں امریکی فیڈرل ریزرو کی جانب سے شرح سود میں اضافے کا 61 فیصد امکان ظاہر کیا جارہا ہے۔