مری بریوری، سسٹمز لمیٹڈ اور سازگار فوربز کی ایشیا کی بہترین کمپنیوں میں شامل

تین پاکستانی کمپنیاں مری بریوری، سسٹمز لمیٹڈ اور سازگار انجینئرنگ ورکس، فوربز کی ایشیا کی ’’ایک ارب ڈالر سے کم مالیت کی بہترین کمپنیوں‘‘ کی 2026 کی فہرست میں شامل ہو گئی ہیں۔

فوربز نے کہا کہ ’’فوربز ایشیا کی ایک ارب ڈالر سے کم مالیت کی بہترین کمپنیوں‘‘ کی فہرست میں شامل چھوٹی اور درمیانے درجے کی کمپنیاں جغرافیائی سیاسی کشیدگی اور توانائی کی غیر مستحکم منڈیوں کے چیلنجز سے کامیابی کے ساتھ نمٹ رہی ہیں۔

فوربز نے مزید کہا کہ ایشیا بحرالکاہل کی اسٹاک ایکسچینجز میں درج ان 200 کمپنیوں کی فروخت 10 ملین ڈالر سے زیادہ اور ایک ارب ڈالر سے کم ہے، جبکہ ان کمپنیوں نے مضبوط مالیاتی کارکردگی کا مظاہرہ کیا۔

فوربز کے مطابق مری بریوری کمپنی لمیٹڈ کی خالص فروخت 10 کروڑ 20 لاکھ ڈالر رہی، جبکہ اس کی مارکیٹ ویلیو 9 کروڑ 20 لاکھ ڈالر ہے۔

یہ کمپنی 1861 میں پبلک لمیٹڈ کمپنی کے طور پر قائم کی گئی تھی اور برصغیر کی تقسیم سے بھی پہلے وجود میں آ چکی تھی۔ کمپنی کی بنیادی سرگرمیوں میں مختلف اقسام کی مصنوعات کی تیاری اور فروخت شامل ہے، جن میں الکوحل والی بیئر بھی شامل ہے۔

فوربز کے مطابق سسٹمز لمیٹڈ کی فروخت 28 کروڑ 60 لاکھ ڈالر رہی، جبکہ اس کی مارکیٹ ویلیو 75 کروڑ 90 لاکھ ڈالر تھی۔

سسٹمز لمیٹڈ کی بنیادی سرگرمیوں میں سافٹ ویئر کی تیاری اور تجارت کے ساتھ ساتھ کاروباری عمل کی آؤٹ سورسنگ کی خدمات فراہم کرنا شامل ہے۔ کمپنی اپنے صارفین کو ڈیجیٹل تبدیلی کے سفر میں معاونت فراہم کرتی ہے۔ مقامی مارکیٹ میں نمایاں موجودگی کے علاوہ کمپنی امریکا، برطانیہ، یورپی یونین اور مشرق وسطیٰ سمیت مختلف خطوں میں بھی مضبوط بین الاقوامی موجودگی رکھتی ہے۔

دریں اثنا فوربز کے مطابق سازگار انجینئرنگ ورکس کی فروخت 38 کروڑ 90 لاکھ ڈالر جبکہ خالص آمدنی 5 کروڑ 80 لاکھ ڈالر رہی۔

سازگار انجینئرنگ ورکس لمیٹڈ 1991 میں پاکستان میں پرائیویٹ لمیٹڈ کمپنی کے طور پر قائم ہوئی اور بعد ازاں 1994 میں پبلک لمیٹڈ کمپنی بن گئی۔

کمپنی کا بنیادی کاروبار گاڑیوں، آٹو موٹو پارٹس و لوازمات اور گھریلو برقی آلات کی تیاری اور فروخت پر مشتمل ہے۔ اس کے پیداواری پلانٹس لاہور میں واقع ہیں۔