ای سی سی کی پٹرول، ڈیزل ڈیلرز کے مارجن میں اضافے کی منظوری

وزارتِ خزانہ نے ایک پریس ریلیز میں بتایا ہے کہ کابینہ کی اقتصادی رابطہ کمیٹی (ای سی سی) نے جمعے کو موٹر اسپرٹ (ایم ایس) اور ہائی اسپیڈ ڈیزل (ایچ ایس ڈی) پر ڈیلرز کے مارجن میں ترمیم کی منظوری دے دی۔

اجلاس کی صدارت وفاقی وزیر خزانہ و محصولات سینیٹر محمد اورنگزیب نے وزارتِ خزانہ میں کی۔ ای سی سی نے پٹرولیم ڈویژن کی جانب سے پیش کردہ سمری پر غور کیا اور پٹرولیم مصنوعات پر ڈیلرز کے مارجن میں مجوزہ ترمیم پر بحث کی۔

وفاقی وزرا رانا تنویر حسین، علی پرویز ملک اور احد خان چیمہ کے علاوہ متعلقہ وزارتوں اور ڈویژنز کے وفاقی سیکریٹریز اور اعلیٰ حکام نے اجلاس میں شرکت کی۔

ذرائع کے مطابق پاکستان پٹرولیم ڈیلرز ایسوسی ایشن کی جانب سے ہڑتال کی دھمکی کے بعد حکومت نے اقدام کرتے ہوئے پٹرولیم مصنوعات پر ڈیلرز کے مارجن میں 1.34 روپے فی لیٹر اضافے کی منظوری دے دی، جس کے بعد ڈیلرز کا مجموعی مارجن 10 روپے فی لیٹر ہوگیا۔

ذرائع نے بتایا کہ حکومت کی جانب سے ڈیلرز کے مارجن میں اضافے کے فیصلے کے بعد پٹرولیم ڈیلرز نے ہفتے کو ہونے والی ہڑتال مؤخر کردی۔

آل پاکستان پٹرول پمپ اونرز ایسوسی ایشن کے وائس چیئرمین نعمان علی بٹ نے ڈیلرز کے مارجن میں اضافے کی تصدیق کرتے ہوئے وزیراعظم اور وزیر پٹرولیم کا شکریہ ادا کیا۔