بھارت : ملازمت کے امتحانات میں مبینہ دھاندلی کے خلاف ہزاروں نوجوانوں کا اسمبلی کی طرف مارچ
- مظاہرین کے مطالبات میں صوبائی امتحانات کے نظام میں مکمل تبدیلی، بعض ٹیسٹس کی منسوخی اور وفاقی پولیس سے تحقیقات کرانا شامل ہے
بھارتی ریاست جھارکھنڈ میں سرکاری ملازمتوں کے لیے ہونے والے امتحانات میں مبینہ بے ضابطگیوں کے خلاف پیر کو ہزاروں نوجوانوں نے اسمبلی کی جانب مارچ کیا، جس پر پولیس نے مظاہرین کو منتشر کرنے کے لیے پانی کی توپوں کا استعمال کیا۔
جھارکھنڈ کے نوجوانوں نے امتحانات میں پرچے لیک ہونے سمیت دیگر بے ضابطگیوں کے خلاف احتجاج شروع کر رکھا ہے۔ مظاہرین کے مطالبات میں امتحانی نظام میں اصلاحات، بعض امتحانات منسوخ کرنا اور وفاقی پولیس کے ذریعے تحقیقات کرانا شامل ہیں۔ رانچی میں ہزاروں افراد کے جمع ہونے کے بعد 25 جولائی کو شروع ہونے والا احتجاج شدت اختیار کر گیا۔
پیر کو سخت حفاظتی انتظامات کے باوجود مظاہرین پلے کارڈز اٹھائے اور نعرے لگاتے ہوئے پولیس کی جانب سے قائم کی گئی رکاوٹیں عبور کر گئے۔ ریاستی حکومت نے مظاہرین کے ساتھ مذاکرات کے دوران بتایا کہ ان کے بیشتر مطالبات تسلیم کر لیے گئے ہیں۔
یہ احتجاج نوجوانوں میں بڑھتی ہوئی بے روزگاری اور تعلیمی شعبے میں بدعنوانی کے خلاف پائی جانے والی شدید بے چینی کی عکاسی کرتا ہے۔ اس سے قبل دہلی میں طبی داخلہ امتحان کا پرچہ لیک ہونے کے معاملے پر وزیر تعلیم کے استعفے کے مطالبے کے بعد بھی ملک بھر میں احتجاج دیکھنے میں آیا تھا۔
Comments