پاکستان اسٹاک ایکسچینج میں سرمایہ کاروں کی تعداد پہلی بار 6 لاکھ سے تجاوز کر گئی

پاکستان اسٹاک ایکسچینج (پی ایس ایکس) میں سرمایہ کاروں کی تعداد تاریخ میں پہلی بار 6 لاکھ سے تجاوز کر گئی، جو ریٹیل سرمایہ کاروں کی بڑھتی ہوئی شمولیت اور ملکی کیپٹل مارکیٹ پر اعتماد میں اضافے کی عکاسی کرتی ہے۔

وزارتِ خزانہ کی جانب سے جمعرات کو جاری کردہ اعداد و شمار کے مطابق جولائی کے اختتام پر سرمایہ کاروں کی مجموعی تعداد 6 لاکھ 7 ہزار 25 تک پہنچ گئی، جبکہ ماہ کے دوران 23 ہزار 973 نئے سرمایہ کاروں نے اکاؤنٹس کھلوائے، جو ایک ماہ میں سرمایہ کاروں کے اضافے کی تاریخ کا دوسرا بڑا ریکارڈ ہے۔

وزارتِ خزانہ کے مطابق حالیہ اضافہ بڑی حد تک جنریشن زی (جین زی) اور پہلی بار سرمایہ کاری کرنے والے ریٹیل سرمایہ کاروں کی بدولت ممکن ہوا، جو پاکستان کی ایکویٹی مارکیٹ میں عوامی شرکت کے فروغ کی نشاندہی کرتا ہے۔

اعداد و شمار کے مطابق جون 2022 کے بعد سے پی ایس ایکس میں سرمایہ کاروں کی تعداد 2 لاکھ 75 ہزار سے بڑھ کر 6 لاکھ 7 ہزار سے تجاوز کر گئی، یعنی چار برس سے کچھ زیادہ عرصے میں 3 لاکھ 32 ہزار سے زائد سرمایہ کاروں کا اضافہ ہوا، جو 121 فیصد نمو کے برابر ہے۔

سرمایہ کاروں کی تعداد میں اضافے کی رفتار بھی نمایاں طور پر تیز ہوئی ہے۔ مالی سال 2023 اور 2024 میں اوسطاً ہر ماہ تقریباً 2 ہزار 300 نئے سرمایہ کار شامل ہوئے، جو مالی سال 2025 میں بڑھ کر 5 ہزار 300 ہو گئے، جبکہ مالی سال 2026 میں یہ تعداد چھلانگ لگا کر 15 ہزار 860 ماہانہ تک پہنچ گئی۔

یاد رہے کہ پاکستان اسٹاک ایکسچینج میں سرمایہ کاروں کی تعداد فروری 2026 میں پہلی بار 5 لاکھ کی حد عبور کر گئی تھی۔