جوہری معاہدے کی امید، ایران پر امریکی حملہ ٹلتے ہی خام تیل کی قیمتیں گر گئیں

عالمی منڈی میں خام تیل کی قیمتوں میں پیر کو نمایاں کمی دیکھی گئی، جب امریکی صدر ڈونلڈ ٹرمپ نے ایران کے خلاف فوری نئی فوجی کارروائی مؤخر کرتے ہوئے تہران کے ساتھ جوہری پروگرام پر جلد معاہدے کی امید ظاہر کی۔ اس پیش رفت سے آبنائے ہرمز دوبارہ کھولے جانے کی توقعات بڑھ گئیں، جس کے بعد تیل کی قیمتیں تقریباً 4 ڈالر فی بیرل تک گر گئیں۔

برینٹ خام تیل کے فیوچر 4.08 ڈالر یا 4.64 فیصد کمی کے بعد 83.85 ڈالر فی بیرل پر آ گئے، جبکہ امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل 4.01 ڈالر یا 4.74 فیصد گر کر 80.66 ڈالر فی بیرل پر ٹریڈ کرتا رہا۔

گزشتہ ماہ امریکا اور ایران کے درمیان دوبارہ شروع ہونے والی جھڑپوں، عمان کے قریب کئی آئل ٹینکروں پر حملوں اور خلیجی پانیوں میں سکیورٹی خدشات کے باعث دونوں خام تیل کے معاہدوں کی قیمتوں میں 20 فیصد سے زائد اضافہ ہوا تھا۔

صدر ٹرمپ نے ہفتے کی شب اپنے سوشل میڈیا پلیٹ فارم ٹروتھ سوشل پر کہا کہ ایران اور مشرق وسطیٰ کے دیگر ممالک نے معاہدے کو حتمی شکل دینے کے لیے مزید وقت مانگا ہے، جس کے نتیجے میں آبنائے ہرمز فوری، مکمل اور مستقل طور پر دوبارہ کھول دی جائے گی اور ایران کے جوہری خطرے کا خاتمہ ممکن ہوگا۔

آئی جی مارکیٹ کے تجزیہ کار ٹونی سائکامور کے مطابق سرمایہ کار اس بات پر گہری نظر رکھے ہوئے ہیں کہ آیا اس ہفتے بھی گزشتہ ہفتے کی طرح مذاکرات ناکام ہو جاتے ہیں یا ایران آبنائے ہرمز پر اپنے اثرورسوخ کو برقرار رکھتے ہوئے کسی امریکی اڈے یا وہاں سے گزرنے والے آئل ٹینکر کو نشانہ بناتا ہے۔

ادھر شپنگ ڈیٹا کے مطابق ہفتے اور اتوار کے دوران سعودی عرب کا خام تیل لے جانے والے دو ٹینکر بحیرہ احمر سے باب المندب آبنائے عبور کر گئے، جبکہ آبنائے ہرمز میں جہازوں کی آمدورفت ٹینکروں پر حملوں کی اطلاعات کے بعد سست رہی۔ برطانیہ کی یو کے میری ٹائم ٹریڈ آپریشنز نے ہفتے سے اب تک مزید تین ٹینکروں پر حملوں کی اطلاعات بھی جاری کی ہیں۔

دوسری جانب اوپیک پلس نے ستمبر سے یومیہ تقریباً 188,000 بیرل اضافی پیداوار کے کوٹے کی منظوری دے دی ہے، تاہم ایران اور یوکرین کی جنگوں کے باعث برآمدات میں رکاوٹوں کے سبب تجزیہ کاروں کا کہنا ہے کہ اس اضافی سپلائی کا عالمی منڈی پر فوری اثر محدود رہنے کا امکان ہے۔