ملائیشین پام آئل کی قیمتوں میں کمی ریکارڈ

ملائیشین پام آئل کی قیمتوں میں جمعرات کو کمی ریکارڈ کی گئی، چار سیشنز میں تیسری بار مندی دیکھی گئی کیونکہ حریف خوردنی تیل کی کمزور قیمتوں نے پام آئل مارکیٹ پر بھی دباؤ برقرار رکھا۔

دوپہر کے وقفے تک برسا ملائیشیا ڈیریویٹوز ایکسچینج پر اکتوبر کی ترسیل کا بینچ مارک پام آئل معاہدہ 13 رنگٹ یا 0.28 فیصد کمی کے ساتھ 4,651 رنگٹ (1,138.56 ڈالر) فی میڑک ٹن پر آ گیا۔

کوالالمپور میں قائم ایک تاجر نے کہا کہ حریف آئل سیڈ مارکیٹوں میں معمولی کمزوری کے باعث خام پام آئل فیوچرز بھی دباؤ کا شکار رہے اور کم سطح پر ٹریڈ ہوئے۔

تاجر نے مزید کہا کہ بینچ مارک اکتوبر معاہدہ صبح کے پورے کاروباری سیشن کے دوران غیر متاثر کن انداز میں ٹریڈ ہوتا رہا جبکہ مارکیٹ کے شرکا محتاط رویہ اختیار کیے ہوئے تھے جس کے باعث کاروباری سرگرمی معمول سے کم رہی۔ دریں اثنا ڈالیان میں سب سے زیادہ سرگرم سویا آئل معاہدہ 0.32 فیصد گرگیا جبکہ پام آئل معاہدے میں 0.01 فیصد کمی ریکارڈ کی گئی۔

شکاگو بورڈ آف ٹریڈ میں سویا آئل کی قیمتیں بھی 0.33 فیصد نیچے رہیں۔ پام آئل کی قیمتیں حریف خوردنی تیلوں کی قیمتوں کے اتار چڑھاؤ کی پیروی کرتی ہیں کیونکہ عالمی ویجیٹیبل آئلز مارکیٹ میں حصہ حاصل کرنے کے لیے ان کے درمیان سخت مسابقت پائی جاتی ہے۔

پام آئل کی تجارت میں استعمال ہونے والی کرنسی رنگٹ امریکی ڈالر کے مقابلے میں 0.05 فیصد مضبوط ہوئی جس کے باعث غیر ملکی کرنسی رکھنے والے خریداروں کے لیے یہ جنس معمولی طور پر مہنگی ہو گئی۔

توانائی کی وزارت کی ایک دستاویز کے مطابق انڈونیشیا نے 2026 کے لیے پام آئل پر مبنی بایو ڈیزل کا کوٹہ بڑھا کر 1 کروڑ 67 لاکھ 50 ہزار کلو لیٹر کردیا ہے تاکہ رواں ماہ کے آغاز میں نافذ کیے گئے بی 50 بایو ڈیزل پروگرام کے تحت پیدا ہونے والی اضافی طلب پوری کی جاسکے۔

رائٹرز کے تکنیکی تجزیہ کار وانگ تاؤ نے کہا کہ پام آئل کی قیمت 4,524 رنگٹ فی ٹن تک واپس آسکتی ہے کیونکہ یہ 4,675 رنگٹ کی سپورٹ سطح کو توڑ چکی ہے اور اب ایک ٹری اینگل تکنیکی پیٹرن میں داخل ہوگئی ہے۔