یمن تنازع کا فوجی حل ممکن نہیں، ایرانی وزیر خارجہ

ایران کے وزیر خارجہ عباس عراقچی نے ہفتے کے روز کہا ہے کہ یمن میں سعودی عرب اور تہران کے حمایت یافتہ حوثی باغیوں کے درمیان شدت اختیار کرتے تنازع کا کوئی فوجی حل موجود نہیں، جبکہ دونوں فریق حالیہ دنوں میں ایک دوسرے پر حملے کر چکے ہیں۔

سرکاری اخبار ایران ڈیلی کو دیے گئے ایک انٹرویو میں عباس عراقچی نے کہا، ”ہمارا ماننا ہے کہ یمن، باب المندب اور خطے کے دیگر تنازعات کا کوئی فوجی حل نہیں، ان مسائل کا واحد راستہ مذاکرات ہیں۔“

انہوں نے کہا کہ یمن کی موجودہ صورتحال کو ایران سے منسوب نہیں کیا جا سکتا اور باب المندب آبنائے کے علاقے میں پیش آنے والے واقعات کی جڑیں یمن، سعودی عرب اور خطے کے دیگر ممالک کے درمیان دیرینہ تنازعات اور اختلافات میں پیوست ہیں۔

یمن میں حوثیوں اور سعودی عرب کے درمیان کشیدگی، جو 2022 میں اقوام متحدہ کی ثالثی میں ہونے والی جنگ بندی کے بعد بڑی حد تک تھم گئی تھی، اس ماہ دوبارہ شدت اختیار کر گئی۔ تہران کے حمایت یافتہ حوثی باغیوں نے سعودی بندرگاہوں کی ناکہ بندی کا اعلان کیا اور آئل ٹینکروں پر حملوں کی بھی ذمہ داری قبول کی۔

اس ناکہ بندی نے، آبنائے ہرمز پر ایران کی متوازی ناکہ بندی کے تناظر میں، سعودی عرب کی عالمی منڈیوں تک اپنی رسد پہنچانے کی صلاحیت کو خطرے سے دوچار کر دیا ہے، کیونکہ یہ مملکت کا واحد دوسرا بحری راستہ بھی ہے۔

دوسری جانب، جمعہ کے روز حوثیوں کے ایک ترجمان نے کہا کہ باغی باب المندب آبنائے سے گزرنے والی بحری آمدورفت میں رکاوٹ نہیں ڈال رہے اور ان کی بحری ناکہ بندی صرف سعودی عرب سے متعلق جہاز رانی تک محدود ہے۔