ایس سی او اجلاس : پاکستان اور ایران کا علاقائی امن کے لیے عزم کا اعادہ

نائب وزیر اعظم اور وزیر خارجہ سینیٹر محمد اسحاق ڈار نے کرغز جمہوریہ کے شہر چولپون آتا میں شنگھائی تعاون تنظیم (ایس سی او) کی کونسل آف فارن منسٹرز (سی ایف ایم) کے اجلاس کے موقع پر ایرانی ہم منصب سید عباس عراقچی سے ملاقات کی، جہاں دونوں فریقین نے دوطرفہ تعلقات کو مضبوط بنانے اور علاقائی امن کو فروغ دینے کے عزم کا اعادہ کیا۔

دفترِ خارجہ کے مطابق دونوں وزرائے خارجہ نے خطے کی بدلتی ہوئی صورتحال کا جائزہ لیا اور پاکستان اور ایران کے درمیان دیرینہ اور قریبی تعلقات کا اعادہ کیا۔اسحاق ڈار نے حالیہ علاقائی کشیدگی پر شدید تشویش کا اظہار کیا اور تمام فریقین کی جانب سے مذاکرات، ضبطِ نفس، کشیدگی میں کمی اور پائیدار امن و استحکام کے حصول کے لیے مسلسل سفارتی رابطوں کی اہمیت پر زور دیا۔

انہوں نے جون 2026ء میں طے پانے والے اسلام آباد میمورنڈم آف انڈرسٹینڈنگ (ایم او یو) کے تحت حاصل ہونے والی تفہیم کو مزید آگے بڑھانے کی ضرورت پر بھی زور دیا۔ایرانی وزیر خارجہ عباس عراقچی نے پاکستان کی مسلسل سفارتی حمایت اور علاقائی امن و سلامتی کے فروغ میں اس کے تعمیری کردار کو سراہا۔انہوں نے ایرانی ماہی گیروں اور عملے کے اراکین بشمول امریکہ کی جانب سے روکے گئے جہازوں کے عملے کی محفوظ واپسی میں سہولت کاری فراہم کرنے اور ان کی پاکستان کے راستے ایران محفوظ منتقلی و واپسی کے لیے ایرانی، امریکی اور دیگر متعلقہ حکام کے ساتھ قریبی رابطہ کاری پر بھی پاکستان کا شکریہ ادا کیا۔دونوں وزراء نے باہمی دلچسپی کے امور پر قریبی رابطہ اور باقاعدہ مشاورت برقرار رکھنے پر اتفاق کیا اور علاقائی امن، استحکام اور مشترکہ خوشحالی کے لیے مل کر کام کرنے کے اپنے عزم کا اعادہ کیا۔