سندھ میں شدید بارشوں کی پیش گوئی، نشیبی علاقوں میں اربن فلڈنگ کا خدشہ

پاکستان محکمہ موسمیات (پی ایم ڈی) نے جمعہ کو سندھ کے مختلف اضلاع میں 27 جولائی تک وقفے وقفے سے بارش، آندھی اور گرج چمک کی پیش گوئی کرتے ہوئے خبردار کیا ہے کہ بعض مقامات پر شدید بارش کے باعث نشیبی علاقوں میں شہری سیلاب (اربن فلڈنگ) کا خطرہ ہے۔

محکمہ موسمیات کے مطابق جنوب مغربی راجستھان اور ملحقہ علاقوں پر موجود کم دباؤ کا نظام اور بحیرہ عرب سے آنے والی مضبوط مون سون ہوائیں پاکستان کے جنوبی اور وسطی علاقوں کے موسم کو متاثر کر رہی ہیں۔

پی ایم ڈی نے بتایا کہ تھرپارکر، عمرکوٹ، میرپورخاص، بدین، سانگھڑ، ٹنڈو محمد خان، ٹنڈو الہٰ یار، حیدرآباد، مٹیاری، جامشورو اور شہید بینظیر آباد میں جمعہ سے 27 جولائی تک وقفے وقفے سے درمیانی سے موسلادھار بارش کا امکان ہے۔

اسی دوران گھوٹکی، کشمور، جیکب آباد، شکارپور، سکھر، قمبر شہدادکوٹ، لاڑکانہ، خیرپور، نوشہرو فیروز اور ٹھٹھہ میں بھی ہلکی سے درمیانی بارش اور گرج چمک متوقع ہے۔

محکمہ موسمیات نے خبردار کیا ہے کہ آندھی اور آسمانی بجلی کے باعث سولر پینلز، بجلی کے کھمبوں اور اشتہاری بورڈز جیسے کمزور ڈھانچوں کو نقصان پہنچ سکتا ہے۔

مزید کہا گیا ہے کہ تھرپارکر، عمرکوٹ، میرپورخاص، بدین، سانگھڑ، ٹنڈو محمد خان، ٹنڈو الہٰ یار، حیدرآباد، مٹیاری اور شہید بینظیر آباد میں بعض مقامات پر شدید بارش کے باعث شہری سیلاب کی صورتحال پیدا ہو سکتی ہے۔

پی ایم ڈی نے کسانوں کو مشورہ دیا ہے کہ وہ موسمی پیش گوئی کو مدنظر رکھتے ہوئے اپنی زرعی سرگرمیوں کی منصوبہ بندی کریں اور مویشیوں کی حفاظت کو یقینی بنائیں۔ محکمہ کے مطابق پیش گوئی کے دوران سندھ میں جاری گرم اور مرطوب موسم میں بھی کمی آنے کا امکان ہے۔

کراچی کے بارے میں محکمہ موسمیات نے پیش گوئی کی ہے کہ شہر میں موسم جزوی طور پر ابر آلود، گرم اور مرطوب رہے گا، جبکہ مضافاتی علاقوں میں گرج چمک کے ساتھ بارش کا امکان ہے۔ ہفتہ اور اتوار کے دوران شہر کے چند مقامات پر ہلکی بارش یا بوندا باندی بھی ہو سکتی ہے۔

محکمہ موسمیات کے مطابق کراچی میں ہفتے کے اختتام تک کم سے کم درجہ حرارت 28 ڈگری سینٹی گریڈ جبکہ زیادہ سے زیادہ درجہ حرارت 37 ڈگری سینٹی گریڈ تک رہنے کی توقع ہے۔