کراچی میں ہلکی بارش اور بوندا باندی کا امکان

محکمہ موسمیات (پی ایم ڈی) نے پیشگوئی کی ہے کہ اگلے تین دنوں کے دوران سندھ کے بیشتر حصوں میں موسم گرم اور مرطوب رہنے کا امکان ہے۔ تاہم ساحلی علاقوں اور ضلع تھرپارکر میں مطلع جزوی طور پر ابر آلود رہنے اور کچھ مقامات پر بوندا باندی یا ہلکی بارش کی توقع ہے۔

محکمہ موسمیات کے مطابق اتوار سے منگل تک کراچی ڈویژن میں بھی اسی طرح کی موسمی صورتحال برقرار رہے گی۔محکمہ موسمیات نے کراچی کے لیے تین روزہ آؤٹ لک (موسم کی صورتحال) جاری کر دی ہے۔ شہرِ قائد میں آج مطلع زیادہ تر ابر آلود اور موسم مرطوب رہے گا، جبکہ چند مقامات پر بوندا باندی یا ہلکی بارش کا امکان ہے۔ آج زیادہ سے زیادہ درجہ حرارت 33 سے 35 سینٹی گریڈ کے درمیان رہنے کی توقع ہے، جبکہ کم سے کم درجہ حرارت 28.5 ڈگری سینٹی گریڈ ریکارڈ کیا گیا۔

پیر کو بھی موسم زیادہ تر ابر آلود اور مرطوب رہے گا اور کچھ مقامات پر بوندا باندی یا ہلکی بارش کا سلسلہ جاری رہنے کا امکان ہے۔ دن کے وقت زیادہ سے زیادہ درجہ حرارت 33 سے 35 ڈگری سینٹی گریڈ تک جانے کی پیشگوئی ہے، جبکہ رات کو کم سے کم درجہ حرارت 28 سے 30 ڈگری سینٹی گریڈ تک گر سکتا ہے۔منگل کے روز بھی شہر میں مطلع زیادہ تر ابر آلود اور موسم مرطوب رہنے کے ساتھ ساتھ چند مقامات پر بوندا باندی یا ہلکی بارش کا امکان برقرار رہے گا۔ زیادہ سے زیادہ درجہ حرارت 33 سے 35 ڈگری سینٹی گریڈ کے درمیان رہے گا، جبکہ کم سے کم درجہ حرارت 28 سے 30 ڈگری سینٹی گریڈ کے درمیان رہنے کی توقع ہے۔

محکمہ موسمیات نے مزید بتایا کہ اس ساحلی شہر میں ان تینوں دنوں کے دوران شام کے وقت ہوا میں نمی کا تناسب زیادہ رہے گا، جو 55 سے 65 فیصد کے درمیان رہے گا۔