اردن میں ایرانی حملے میں دو امریکی فوجی ہلاک، ایک لاپتہ، سینٹ کام

امریکی سینٹرل کمانڈ (سینٹ کام) نے کہا ہے کہ 17 جولائی بروز جمعہ اردن کو نشانہ بنانے والے ایران کے بیلسٹک میزائل اور ڈرون حملوں میں دو امریکی فوجی ہلاک جبکہ ایک اہلکار تاحال لاپتہ ہے۔

سینٹ کام کے مطابق حملے میں زخمی ہونے والے چار امریکی فوجیوں کو علاج کے لیے اردن کے اسپتالوں میں منتقل کیا گیا تھا، تاہم طبی امداد کے بعد انہیں اسپتال سے فارغ کر دیا گیا۔

سینٹ کام نے اپنے بیان میں کہا، ”17 جولائی کو اردن میں تعینات دو امریکی فوجی ایران کے بیلسٹک میزائلوں اور ڈرون حملوں کے خلاف امریکی سینٹرل کمانڈ (سینٹ کام) اور اس کی اتحادی افواج کی دفاعی کارروائی کے دوران ہلاک ہوئے۔ اس کے علاوہ ایک امریکی فوجی تاحال لاپتہ ہے۔“

بیان کے مطابق چار امریکی فوجیوں کو علاج کے لیے اردن کے اسپتالوں میں منتقل کیا گیا تھا، تاہم بعد ازاں انہیں اسپتال سے فارغ کر دیا گیا، جبکہ معمولی زخمی ہونے والے دیگر اہلکار طبی معائنے کے بعد دوبارہ اپنی ذمہ داریاں سنبھال چکے ہیں۔

سینٹ کام نے کہا، ”لواحقین کے احترام میں ہلاک ہونے والے فوجیوں کی شناخت سمیت مزید کوئی معلومات اس وقت تک جاری نہیں کی جائیں گی جب تک قریبی اہلِ خانہ کو اطلاع دیے جانے کے 24 گھنٹے مکمل نہیں ہو جاتے۔“