روسی حملوں میں یوکرین کے 4 افراد ہلاک، 10 زخمی

روس کی جانب سے جمعرات اور جمعہ کی درمیانی شب یوکرین پر کیے گئے حملوں میں کم از کم 4 افراد ہلاک جبکہ 10 دیگر زخمی ہو گئے۔ یوکرینی حکام نے ٹیلی گرام پر جاری بیانات میں حملوں کی تصدیق کی ہے۔

سرحدی علاقے سومی میں روسی ڈرون ایک رہائشی مکان سے ٹکرا گیا، جس کے نتیجے میں دو خواتین، ایک معمر شخص اور دو سال سے کم عمر ایک بچی جاں بحق ہو گئے، جبکہ 3 افراد زخمی ہوئے۔ سومی کی علاقائی فوجی انتظامیہ کے سربراہ اولیہ ہریہوروف کے مطابق امدادی ٹیموں نے متاثرہ مقام پر کارروائیاں شروع کر دیں۔

دوسری جانب وسطی یوکرین کے شہر کریوی ریہ، جو صدر وولودیمیر زیلنسکی کا آبائی شہر ہے، روسی میزائل حملے کی زد میں آ گیا۔ شہر کی دفاعی کونسل کے سربراہ اولیکساندر ولکول نے بتایا کہ گنجان آباد شہری علاقے پر حملے کے نتیجے میں 7 افراد زخمی ہوئے، جنہیں طبی امداد فراہم کی جا رہی ہے۔

ادھر یوکرین کے دارالحکومت کیف میں جمعرات کو ہونے والے روسی حملے میں کم از کم تین درجن افراد ہلاک ہونے کے بعد جمعہ کو یومِ سوگ منایا جا رہا ہے۔ یہ رواں سال کیف پر ہونے والا سب سے مہلک روسی حملہ قرار دیا جا رہا ہے۔