وینزویلا میں زلزلوں سے 58 ہزار سے زائد عمارتیں تباہ یا متاثر ہوئیں، سیٹلائٹ ڈیٹا

گزشتہ ہفتے وینزویلا میں آنے والے طاقتور زلزلوں کے نتیجے میں 58 ہزار 870 سے زائد عمارتیں تباہ یا شدید متاثر ہوئی ہیں۔ یہ ابتدائی تخمینہ امریکی خلائی ادارے ناسا نے سیٹلائٹ ڈیٹا کی بنیاد پر جاری کیا ہے۔

ناسا کے مطابق 7.2 اور 7.5 شدت کے ان زلزلوں میں اب تک 1,700 افراد ہلاک ہو چکے ہیں، جبکہ ہزاروں افراد تاحال لاپتا ہیں۔ یہ ایک صدی سے زائد عرصے میں وینزویلا میں آنے والے طاقتور ترین زلزلے قرار دیے جا رہے ہیں۔

یہ ابتدائی جائزہ اوریگن اسٹیٹ یونیورسٹی کے محققین کوری شیر اور جیمن وین ڈین ہوک نے یورپی خلائی ایجنسی کے سینٹینل-1 ریڈار سیٹلائٹ سے حاصل کردہ تصاویر کی مدد سے تیار کیا۔ محققین نے واضح کیا کہ یہ صرف ایک ابتدائی اور فوری تجزیہ ہے، جس کی زمینی سطح پر ابھی تصدیق نہیں کی گئی۔

دوسری جانب وینزویلا کی قومی اسمبلی کے صدر جارج روڈریگیز نے بتایا کہ اب تک 855 عمارتوں کو نقصان پہنچنے کی تصدیق ہوئی ہے، جن میں 189 مکمل طور پر منہدم ہو چکی ہیں۔

ناسا کا کہنا ہے کہ اس کے سیٹلائٹس امدادی کارروائیوں میں اہم کردار ادا کر رہے ہیں اور متاثرہ علاقوں کی تصاویر اور ڈیٹا فراہم کرکے زمینی ٹیموں کو نقصانات کا درست اندازہ لگانے اور امدادی سرگرمیوں کی منصوبہ بندی میں مدد دے رہے ہیں۔