پاکستان نے افغانستان کو شکست دے کر انٹرنیشنل فٹبال ٹورنامنٹ کا ٹائٹل جیت لیا

پاکستان کی فٹبال ٹیم نے ڈائمنڈ جوبلی انٹرنیشنل فٹبال ٹورنامنٹ 2026 جیت کر تاریخ رقم کر دی۔

مالدیپ کے دارالحکومت مالے میں پاکستان نے فائنل میں افغانستان کو دو۔ صفر سے شکست دے کر اپنی تاریخ کا پہلا باضابطہ بین الاقوامی فٹبال ٹورنامنٹ اپنے نام کیا۔

پاکستان کی طرف سے شائق دوست اور ہارون حامد نے ایک، ایک گول کیا۔

قومی ٹیم پورے ٹورنامنٹ میں ناقابلِ شکست رہی۔

اس ٹورنامنٹ میں حصہ لینے والی چار ٹیموں میں پاکستان، افغانستان، بنگلہ دیش انڈر-23، اور میزبان مالدیپ شامل تھے۔

پاکستان نے 64 سال بعد کسی بین الاقوامی فٹبال ٹورنامنٹ کا ٹائٹل جیتا۔ پاکستان آخری بار 1962 میں مردیکا کپ کے فائنل میں پہنچا تھا۔

دوسری جانب وزیراعظم شہباز شریف نے ڈائمنڈ جوبلی انٹرنیشنل فٹبال ٹورنامنٹ کے فائنل میں افغانستان کو شکست دے کر چیمپئن بننے پر پاکستان فٹبال ٹیم، کوچز اور انتظامیہ کو دلی مبارکباد پیش کی ۔

وزیراعظم نے کہا کہ یہ تاریخی کامیابی پوری قوم کے لیے باعثِ فخر ہے۔ پاکستان کی فٹبال ٹیم نے شاندار کھیل، عزم اور ٹیم ورک کا مظاہرہ کرتے ہوئے ملک کا نام عالمی سطح پر روشن کیا ہے۔

وزیراعظم نے کہا کہ یہ پاکستان کی تاریخ کا پہلا باضابطہ بین الاقوامی فٹبال ٹورنامنٹ ٹائٹل ہے جو قومی کھیلوں کے فروغ اور نوجوان کھلاڑیوں کے لیے ایک اہم سنگِ میل کی حیثیت رکھتا ہے۔

وزیراعظم نے اس امید کا اظہار کیا کہ قومی فٹبال ٹیم آئندہ بھی اسی جذبے اور محنت کے ساتھ کامیابیاں سمیٹتے ہوئے پاکستان کا پرچم بلند رکھے گی۔