صدر مملکت آصف زرداری اور وزیراعظم شہباز شریف کی قوم کو عیدالاضحیٰ کی مبارکباد

صدر مملکت آصف علی زرداری اور وزیرِاعظم شہباز شریف نے تمام پاکستانیوں اور پوری امتِ مسلمہ کو عیدالاضحی کی دلی مبارکباد دی ہے۔

اپنے الگ الگ پیغامات میں انہوں نے کہا کہ عیدالاضحی مسلمانوں کو اللہ تعالیٰ کی اطاعت، صبر، وفاداری، اخلاص اور ایثار کے عظیم جذبے کی یاد دلاتی ہے جس کی روشن مثال حضرت ابراہیم علیہ السلام اور حضرت اسماعیل علیہ اسلام کی عظیم سنت میں ملتی ہے۔

صدر مملکت آصف علی زرداری نے کہا کہ قربانی کی حقیقی روح کا تقاضا ہے کہ ہم اپنے دلوں میں دوسروں کے لئے جگہ پیدا کریں۔

انہوں نے کہا کہ عید کی خوشیاں اس وقت تک مکمل نہیں ہوتیں جب تک ضرورت مندوں، یتیموں، بیوائوں، خصوصی افراد اور معاشرے کے دیگر محروم طبقات کو ان خوشیوں میں شامل نہ کیا جائے۔

وزیراعظم شہباز شریف نے کہا کہ ایثار، اتحاد اور یکجہتی کا جذبہ اقوام کی پائیدار ترقی اور خوشحالی کیلئے ناگزیر ہے۔ انہوں نے کہا کہ اس موقع پر پوری قوم فلسطین اور بھارت کے غیر قانونی

زیر قبضہ جموں و کشمیر میں اپنے مظلوم بھائیوں اور بہنوں کے ساتھ مکمل یکجہتی کا اظہار کرتی ہے۔

نائب وزیراعظم اسحاق ڈار نے بھی پاکستان اور دنیا بھر کے مسلمانوں کو عیدالاضحی کی مبارکباد دی ہے۔

عیدالاضحی کے پُرمسرت موقع پر چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر، بحریہ کے سربراہ ایڈمرل نوید اشرف اورفضائیہ کے سربراہ ظہیر احمد بابر سدھو نے پاکستانی عوام کو دلی مبارکباد دی ہے۔

فوج کے شعبہ تعلقات عامہ کے مطابق پاکستان کی مسلح افواج نے پاکستانی عوام کے عزم و حوصلے اور شہدائ، مسلح افواج، قانون نافذ کرنے والے اداروں اور وطن کے تحفظ کے لئے خدمات انجام دینے والے شہریوں کی قربانیوں کو خراجِ تحسین پیش کرتے ہوئے ملک میں پائیدارامن ، خوشحالی اورقومی یکجہتی کے لئے دعاگو ہیں۔