وزیر خزانہ کی ٹوبیکو کمپنی کے وفد سے ملاقات، محصولات اصلاحات پر تبادلہ خیال

وفاقی وزیر خزانہ و محصولات سینیٹر محمد اورنگزیب نے پیر کے روز پاکستان ٹوبیکو کمپنی (پی ٹی سی) کے ایک وفد سے ملاقات کی، جس میں محصولات اصلاحات، ٹیکس نظام میں بہتری اور تمباکو شعبے کی مسابقت بڑھانے کے اقدامات پر تبادلہ خیال کیا گیا۔

وزارت خزانہ کی جانب سے جاری اعلامیے کے مطابق وفد کی قیادت پی ٹی سی کے ایریا ڈائریکٹر (اے پی ایم ای اے سی) اور جنرل منیجر پاکستان عثمان ظہور نے کی، جبکہ وفد میں مارکیٹنگ، کارپوریٹ افیئرز اور مالیاتی امور سے تعلق رکھنے والے سینئر نمائندے بھی شامل تھے۔

ملاقات کے دوران وزیر خزانہ نے حکومت کے وسیع مالیاتی اصلاحاتی ایجنڈے پر روشنی ڈالی، جس کا مقصد محصولات میں اضافہ، ٹیکس نیٹ کو وسعت دینا، نفاذ کے نظام کو مؤثر بنانا اور ٹیکنالوجی پر مبنی شفاف نظام کے ذریعے ریونیو وصولی کو بہتر کرنا ہے۔

انہوں نے کہا کہ ٹیکس انتظامیہ میں جاری اصلاحات عوام، طریقہ کار اور ٹیکنالوجی پر مرکوز ہیں، جن کا مقصد ٹیکس قوانین پر عمل درآمد بہتر بنانا، مالیاتی نقصانات کم کرنا اور معیشت کے تمام شعبوں سے منصفانہ محصولات وصولی یقینی بنانا ہے۔

سینیٹر محمد اورنگزیب نے بتایا کہ ڈیجیٹلائزیشن، ٹیکنالوجی پر مبنی نگرانی اور متعلقہ اداروں کی مشترکہ کارروائیوں کے باعث مختلف شعبوں میں ٹیکس وصولی اور قوانین پر عمل درآمد میں بہتری آئی ہے۔ ان کے مطابق چینی، سیمنٹ، مشروبات، ٹیکسٹائل اور تمباکو صنعتوں میں کارروائیوں سے غیر قانونی اور غیر دستاویزی معاشی سرگرمیوں کی حوصلہ شکنی ہو رہی ہے۔

اجلاس میں تمباکو شعبے اور ویلیو ایڈڈ مصنوعات میں برآمدی صلاحیت اور سرمایہ کاری کے مواقع پر بھی گفتگو ہوئی۔ پی ٹی سی وفد نے حکومت کی اصلاحات اور نفاذی اقدامات کو سراہتے ہوئے ایک مستحکم اور قابل پیشگوئی ٹیکس نظام کی اہمیت پر زور دیا تاکہ رسمی شعبے کی ترقی اور پائیدار محصولات میں اضافہ ممکن بنایا جا سکے۔

ملاقات میں غیر قانونی تجارت، ایکسائز ٹیکسیشن، مارکیٹ رجحانات، علاقائی تجربات اور وفاقی و صوبائی اداروں کے درمیان مربوط نفاذی نظام پر بھی تبادلہ خیال کیا گیا۔