حکومت نے آئیسکو، گیپکو اور فیسکو کی نجکاری کے لیے ٹرانزیکشن اسٹرکچر کی منظوری دے دی
- حکومت کی آئیسکو، گیپکو اور فیسکو کی نجکاری کی منظوری، 51 سے 100 فیصد حصص فروخت کیے جائیں گے
کابینہ کمیٹی برائے نجکاری (سی سی او پی) نے جمعہ کے روز حکومت کی جانب سے بجلی کے شعبے میں کارکردگی اور مالیاتی استحکام بہتر بنانے کی کوششوں کے تحت تین بجلی تقسیم کار کمپنیوں، اسلام آباد الیکٹرک سپلائی کمپنی (آئیسکو)، گوجرانوالہ الیکٹرک پاور کمپنی (گیپکو) اور فیصل آباد الیکٹرک سپلائی کمپنی (فیسکو)، کی نجکاری کے لیے ٹرانزیکشن اسٹرکچر کی منظوری دے دی۔
سرکاری بیان کے مطابق نائب وزیرِاعظم اور وزیرِ خارجہ محمد اسحاق ڈار کی زیرِ صدارت ہونے والے اجلاس میں بجلی کے شعبے کی نجکاری پروگرام سے متعلق اہم امور کا جائزہ لیا گیا۔
کمیٹی نے ٹرانزیکشن اسٹرکچر کی منظوری دیتے ہوئے فیصلہ کیا کہ ہر ڈسکوز کے 51 فیصد سے 100 فیصد تک حصص انتظامی کنٹرول سمیت فروخت کے لیے پیش کیے جائیں گے، تاہم اس کی حتمی منظوری وفاقی کابینہ دے گی۔
حکومت کے مطابق اس اقدام کا مقصد خدمات کی فراہمی کو بہتر بنانا، بجلی کی قابلِ اعتماد فراہمی یقینی بنانا اور بجلی کی تقسیم کے نظام میں نجی شعبے کی مؤثر کارکردگی متعارف کرانا ہے۔
اجلاس میں وفاقی وزیر برائے توانائی، مشیر برائے نجکاری، وزیرِاعظم کے معاونِ خصوصی طارق باجوہ، سیکریٹری کابینہ، سیکریٹری نجکاری کمیشن، سیکریٹری نجکاری ڈویژن، سیکریٹری پاور ڈویژن، نیشنل الیکٹرک پاور ریگولیٹری اتھارٹی (نیپرا) کے چیئرمین، سیکیورٹیز اینڈ ایکسچینج کمیشن آف پاکستان (ایس ای سی پی) کے چیئرمین اور متعلقہ وزارتوں و اداروں کے سینئر حکام نے شرکت کی۔
Comments