وزیراعظم کی چینی وفد سے ملاقات، پاکستان چین ڈیجیٹل معاشی تعاون پر زور

ایک چینی کاروباری وفد نے جمعہ کے روز کہا ہے کہ پاکستان میں آئی بی آئی کے ڈیجیٹل اکانومی ہیڈکوارٹرز کا قیام ملک میں چھوٹے اور درمیانے درجے کے کاروباروں (ایس ایم ایز) کے لیے بڑے پیمانے پر مواقع پیدا کرے گا اور انہیں چین کی وسیع مارکیٹ تک رسائی کا ایک اہم ذریعہ فراہم کرے گا۔

وزیراعظم آفس کی جانب سے جاری پریس ریلیز میں کہا گیا ہے کہ 11 رکنی اعلیٰ سطح چینی کاروباری وفد، جس کی قیادت آئی بی آئی بیجنگ یونائیٹڈ ٹیکنالوجی کے بانی، صدر اور کنٹرولنگ شیئر ہولڈر ژیاؤجون کر رہے تھے، نے وزیراعظم شہباز شریف سے ملاقات کی۔

ملاقات کے دوران وزیراعظم نے کہا کہ پاکستان اور چین کے درمیان تاریخی تعلقات ہیں اور دونوں ممالک ہر موسم کے اسٹریٹجک تعاون پر مبنی شراکت دار ہیں۔ انہوں نے کہا کہ وہ اس ماہ کے آخر میں اپنے آئندہ چین کے دورے کے منتظر ہیں۔

وزیراعظم نے آئی بی آئی گروپ کے پاکستان میں ڈیجیٹل اکانومی ہیڈکوارٹرز کے قیام کے فیصلے کو سراہا اور پاکستان و چین کے درمیان بڑھتے ہوئے بزنس ٹو بزنس تعاون پر اطمینان کا اظہار کیا۔

وزیراعظم شہباز شریف نے کہا کہ یہ امر خاص طور پر حوصلہ افزا ہے کہ آئی بی آئی ڈیجیٹل اکانومی تعاون، سرمایہ کاری کی سہولت اور صنعتی اشتراک کو فروغ دے گا۔

آئی بی آئی کے سربراہ چن ژیاؤجون نے پاکستانی معیشت پر اعتماد کا اظہار کرتے ہوئے کہا کہ کمپنی پاکستان کی معیشت کی ڈیجیٹل تبدیلی کے لیے ایک مضبوط ڈیجیٹل ڈھانچہ قائم کرنے میں مدد دینا چاہتی ہے۔

پریس ریلیز کے مطابق یہ وفد پاکستان چین بی ٹو بی سرمایہ کاری کانفرنس کے تسلسل میں پاکستان آیا ہے، جو ستمبر 2025 میں وزیراعظم کے دورہ چین کے دوران بیجنگ میں منعقد ہوئی تھی۔

مزید بتایا گیا ہے کہ یہ منصوبہ چینی صنعتی ای کامرس کمپنی آئی بی آئی گولین گوفان کی جانب سے قائم کیا جا رہا ہے، جو ڈیجیٹل سلک روڈ کے طور پر کام کرے گا اور چین کے ساتھ 10 ارب ڈالر سے زائد کی ممکنہ تجارت میں معاون ثابت ہوگا۔