وزیراعظم کی وسطی ایشیائی ممالک سے کھاد کے متبادل ذرائع تلاش کرنے کی ہدایت

وزیراعظم شہباز شریف نے ہدایت کی ہے کہ ملک میں کھاد کی مقامی پیداوار بڑھانے کے لیے نئے پلانٹس کے قیام کے منصوبوں پر کام تیز کیا جائے اور وسطی ایشیائی ممالک سے کھاد کے متبادل ذرائع تلاش کئے جائیں۔ وزیراعظم آفس کے مطابق انہوں نے یہ ہدایات ملک میں غذائی تحفظ اور کھاد کے ذخائر کی صورتحال سے متعلق اہم اجلاس کی صدارت کرتے ہوئے دیں۔

اجلاس کو بریفنگ کے دوران بتایا گیا کہ ملکی ضروریات کے پیشِ نظر کھاد کے کارخانوں کو قدرتی گیس کی بلاتعطل فراہمی جاری ہے اور خریف کی فصلوں کے لیے کھاد کے وافر ذخائر موجود ہیں۔ اس موقع پر وزیراعظم نے ہدایت کی کہ کسانوں کو کھاد کی بروقت فراہمی ہر صورت یقینی بنائی جائے۔

انہوں نے مزید کہا کہ خلیجی ممالک سے سپلائی چین متاثر ہونے کے خدشات کے پیشِ نظر وسطی ایشیائی ممالک سے متبادل درآمدات کے لیے منصوبہ بندی کی جائے، تاکہ خریف اور ربیع دونوں سیزنز کے لیے ذخائر کی دستیابی برقرار رہے۔ وزیراعظم نے واضح کیا کہ غذائی تحفظ کے لیے زرعی شعبے کی ضروریات پوری کرنا حکومت کی اولین ترجیح ہے۔ انہوں نے متعلقہ وزارتوں کو کھاد کی فراہمی کی مسلسل نگرانی کرنے اور مصنوعی قلت یا ذخیرہ اندوزی کرنے والوں کے خلاف سخت کارروائی کرنے کا حکم بھی دیا۔