ٹرمپ کی تنقید کا شکار پوپ لیو سے امریکی وزیر خارجہ ملاقات کرینگے

امریکی وزیر خارجہ مارکو روبیو جمعرات کو ویٹی کن میں پوپ لیو سے ملاقات کریں گے، جہاں ایران جنگ کے معاملے پر امریکی صدر ڈونلڈ ٹرمپ کی جانب سے کیتھولک رہنما پر مسلسل تنقید کے باعث یہ ملاقات خاصی حساس سمجھی جا رہی ہے۔

مارکو روبیو، جو ٹرمپ کے قومی سلامتی کے مشیر بھی ہیں، ویٹی کن کے اپاسٹولک پیلس میں پوپ سے بند کمرے میں ملاقات کریں گے، جو تقریباً آدھے گھنٹے جاری رہنے کی توقع ہے۔ بعد ازاں وہ ویٹی کن کے اعلیٰ سفارتکار کارڈینل پیٹرو پیرولین سے بھی ملاقات کریں گے۔

پوپ لیو، جو پہلے امریکی نژاد پوپ ہیں، نے ایران پر امریکا اور اسرائیل کی جنگ اور ٹرمپ انتظامیہ کی سخت امیگریشن پالیسیوں پر کھل کر تنقید کی تھی، جس پر ٹرمپ نے حالیہ ہفتوں میں ان پر متعدد عوامی حملے کیے۔

ٹرمپ نے پیر کو دعویٰ کیا تھا کہ پوپ ایران کے جوہری ہتھیار حاصل کرنے کے حق میں ہیں، جبکہ پوپ لیو نے اس الزام کو مسترد کرتے ہوئے کہا کہ کلیسا ہمیشہ ایٹمی ہتھیاروں کے خلاف رہا ہے اور اس کا مشن امن کا پیغام دینا ہے۔

امریکی سفیر برائے ویٹی کن برائن برچ کے مطابق مارکو روبیو اور پوپ کے درمیان گفتگو واضح اور دوٹوک ہونے کا امکان ہے۔ مارکو روبیو روم میں اطالوی وزیراعظم جارجیا میلونی سے بھی ملاقات کریں گے، جنہوں نے ٹرمپ کے بیانات کے خلاف پوپ کا دفاع کیا تھا۔