کنگ چارلس کے دورے سے قبل امریکا کے ساتھ سیکیورٹی تعاون جاری ہے، برطانیہ

برطانیہ کی حکومت نے کہا ہے کہ کنگ چارلس کے اس ہفتے امریکہ کے دورے سے قبل امریکی سیکیورٹی اداروں کے ساتھ قریبی تعاون جاری ہے۔ یہ بیان ہفتے کے روز وائٹ ہاؤس کورسپانڈنٹس ڈنر کے دوران فائرنگ کے واقعے کے بعد سامنے آیا۔

امریکی صدر ڈونلڈ ٹرمپ اور خاتونِ اول میلانیا ٹرمپ کو ہفتے کی رات واشنگٹن میں ہونے والے عشائیے سے سیکریٹ سروس اہلکاروں نے فوری طور پر محفوظ مقام پر منتقل کر دیا تھا، جب قریبی علاقے میں ایک شخص نے سیکیورٹی اہلکاروں پر فائرنگ کی۔

اس واقعے کے بارے میں اسکائی نیوز سے بات کرتے ہوئے برطانوی وزیرِاعظم کیئر اسٹارمر کے چیف سیکریٹری ڈیرن جونز نے کہا کہ برطانوی حکومت اور بکنگھم پیلس کنگ چارلس کی سیکیورٹی کو انتہائی سنجیدگی سے لیتے ہیں، اور اس حوالے سے تفصیلی مشاورت پہلے ہی جاری ہے جو آئندہ دنوں میں بھی جاری رہے گی۔

انہوں نے مزید کہا کہ ان کے امریکہ کے آئندہ ہفتے کے دورے کے حوالے سے ہماری سیکیورٹی ایجنسیاں امریکی اداروں کے ساتھ قریبی تعاون میں ہیں۔

کنگ چارلس اور ان کی اہلیہ ملکہ کیملا پیر کے روز امریکہ پہنچیں گے، جہاں ان کا چار روزہ دورہ ہوگا۔ اس دورے میں صدر ڈونلڈ ٹرمپ سے ایک نجی ملاقات اور امریکی کانگریس سے خطاب بھی شامل ہے، جو امریکہ کی برطانوی راج سے آزادی کے 250 سال مکمل ہونے کی مناسبت سے ہوگا۔